Ախպրաձոր գյուղի բնակիչները տագնապի մեջ են. երեք օր շարունակ արջն Ալագյոլի սարերից գյուղ է իջնում:
Գեղարքունիքի մարզի Վարդենիսի տարածաշրջանի Ախպրաձոր գյուղի համայնքապետ Լավրենտի Ղազարյանից «Առավոտը» տեղեկացավ, որ ապրիլի 7-ին գյուղ է իջել արջի քոթոթը, շրջել ու հեռացել: Իսկ ապրիլի 8-ին եւ հաջորդ օրը գյուղ է իջել մայր արջը: Ականատեսների վկայությամբ` գորշ արջը մեծ է եւ կունենա շուրջ 300 կգ քաշ:
Երեկոյան ժամերին արջը տնտեսություններին մոտենում է շուրջ 50 մետր հեռավորությամբ, զննում, սակայն չի վնասում: Լ. Ղուկասյանը պատմում է, որ գյուղի տղամարդիկ մոտեցել են արջին, արջը շփոթվել է, մի քանի քայլ առաջ եկել, հետ գնացել, հետո փախել:
Ախպրաձորի երիտասարդները հետեւել են արջին` որջը գտնելու եւ վնասազերծելու նպատակով, սակայն գյուղապետը հետ է պահել նրանց:
Կարդացեք նաև
Արջի այցելությունների մասին տեղեկացվել է Վարդենիսի քաղաքապետարանի համապաստախան ստորաբաժինը, սակայն գյուղում ոչ մի քայլ չի ձեռնարկվել` արջի հնարավոր հարձակումներից պաշտպանվելու համար: Ընդամենը 364 բնակիչ ունեցող գյուղի վերին թաղի բնակիչները վախենում են, հենց մութը սկսում է ընկնել:
Անի ՊՈՂՈՍՅԱՆ
