Այսօր «Նոյյան տապան» գործակալության մամուլի սրահում կայացավ «Հայոց ցեղասպանությունը գրականության մեջ» անգլալեզու գրքի շնորհանդեսը: Գրքի հեղինակ, Կալիֆոռնիայի համալսարանի դասախոս,
գիտաշխատող Ռուբինա Փիրումյանը լրագրողներն տեղեկացրեց, որ սա իր երրորդ գիրքն է: Առաջինը տպագրվել է 1993 թվականին`Literary responses to catastrophe, իսկ երկրորդը՝ 2008 թվականին`And those who continued living in Turkey after վերնագրով: «Հուսով եմ, որ ամեն հայի հայացքը ուղղված է մի ոճրի, որը լկտիաբար ժխտվում է: Բոլոր տեղերում տեսնում եմ պայքար` Հայոց ցեղասպանության ընդունման համար: Լավ կլիներ, որ այն ավելի կազմակերպված ու միահամուռ լիներ»,- ասաց տիկին Փիրումյանը:
Նա ցանկանում է, որ իր գիրքը ներդրում լինի ցեղասպանագիտության ոլորտում:
«Հայոց ցեղասպանությունը գրականության մեջ» գիրքը հրատարակվել է Հայոց ցեղասպանության թանգարան-ինստիտուտի հովանավորությամբ: Վերջինիս տնօրեն Հայկ Դեմոյանը նշեց, որ սա երկրորդ գիրքն է, որ տպագրվում է իրենց աջակցությամբ. «Կապ չունի՝ որտեղ է գրվում գիրքը` Հայաստանո՞ւմ, թե այլ երկրում, կարեւորը տպագրվելն է: Բովանդակության առումով գիրքը կարևոր է այնքանով, որ իրենց հույզերը գրականության միջոցով վերապրածներն են արտահայտել»:
Արամ ԱՐԱՐԱՏՅԱՆ
