«Մխոյանին ինքս չեմ ճանաչում, բայց մի փաստաթղթի տակ կարող եմ ստորագրել, դա ՀԱԿ-ի հետ ոչ մի կապ չի կարող ունենալ, հանրապետությունում նման գործողություններ իրականացնող մի կուսակցություն կա՝ դա ՀՀԿ-ն է,- Aravot.am-ի հետ զրույցում օրեր առաջ թիվ 21 ընտրատարածքում ծեծված ու ինքնաբացարկի դիմած պատգամավորի թեկնածու Մերուժան Մխոյանի հետ կատարված դեպքին անդրադառնալով՝ վստահեցրեց ՍԴՀԿ ներկայացուցիչ Գուրգեն Եղիազարյանը,- Մի բան եղել է, չեմ կարծում, որ ինչ-որ մեկը Բելառուսից կամ Միացյալ նահանգներից եկել է Մխոյանին ծեծի ենթարկել՝ թեկնածությունը հանելու համար»:
Պարոն Եղիազարյանն այս կերպ բացատրեց Մխոյանի հետ տեղի ունեցածը՝ հաշվի առնելով, որ այդ նույն 21 ընտրատարածքում Մխոյանի մրցակիցները ՀԱԿ-ի ու ՀՀԿ-ի ներկայացուցիչներն էին:
Անդրադառնալով 27 ընտրատարածքում իր մրցակիցներին՝ ՀՀԿ-ի ու ԲՀԿ-ի ներկայացուցիչներին, վստահեցրեց, որ ինքը բացարձակ առավելություն ունի նրանց նկատմամբ ու առավելությունը միայն հասակի ու տարիքի մեջ չէ. «Ի տարբերություն նրանց, ես այս իշխանության մասնիկը երբեք չեմ եղել, ինչի համար հանգիստ խոսում եմ այսօր: Իմ ընտրատարածքում կա ծայրահեղ աղքատության հասցրած գյուղացի եւ եթե ինձ հարցնեն՝ ինչպես գյուղացին հասավ այդ վիճակին, կպատասխանեմ՝ այդ վիճակին բերեցին գյուղացուն»:
Արփինե ՍԻՄՈՆՅԱՆ
