Կոտայքի մարզում մեկնարկած «Բարգավաճ Հայաստան» կուսակցության քարոզարշավը այսօր եւ վաղը կշարունակվի հենց Կոտայքի մարզում: Վաղը ԲՀԿ առաջնորդը հանդիպումներ կունենա Չարենցավանում եւ մարզկենտրոն Հրազդանում, իսկ այսօր Գագիկ Ծառուկյանը ԲՀԿ-ի ծրագրերը կներկայացնի Եղվարդում, Նոր Հաճնում եւ Բյուրեղավանում:
«Մենք չենք եկել հեքիաթ ասելու եւ ձայն տանելու»,- եղվարդցիների հետ հանդիպման ժամանակ ասաց Գագիկ Ծառուկյանը: Նա հավաստիացրեց, որ ԲՀԿ-ի խոսքը ինչպես եղել է գործ, այնպես էլ մնալու է գործ: Ու եթե մինչեւ այսօր կուսակցությունը կարողացել է շահել ժողովրդի հարգանքը ու պահպանել այն, սրանից հետո առավել եւս բարձր են գնահատելու ժողովրդի վստահությունը: «Շատ կգան ծրագրեր, հեքիաթներ կներկայացնեն, բայց մեր խոստումները մենք կատարելու ենք»,- ասաց Ծառուկյանը՝ վկայակոչելով այն, որ ԲՀԿ նախընտրական ծրագրում տեղ գտած գյուղատնտեսական ավտոտրանսպորտային պարկի վերաբերյալ դրույթը արդեն իսկ իրականություն է եւ Հայ-բելառուսական կենտրոնում են գտնվում 150 գյուղատնտեսական տրակտորներ, որոնք գյուղացիները կարող են ձեռք բերել 7 տարի մարման ժամկետով:
Ծառուկյանը նաեւ հայտարարեց, որ ԲՀԿ-ն ընտրությունների չի մասնակցում ժողովրդից ինչ-որ բան տանելու ակնկալիքով, հակառակը՝ նկատեց, որ «Ծառուկյանը իր ունեցվածքից միշտ էլ փայաբաժին է հանել»:
Գագիկ Ծառուկյանը նաեւ խոսեց փոքր ու միջին բիզնեսի զարգացման անհրաժեշտության մասին, այդ ոլորտին պետական սուբսիդավորման եւ արտոնություններ տրամադրելու անհրաժեշտության մասին, նկատելով, որ մեր ժողովուրդը աշխատող ժողովուրդ է ու իր աշխատանքում պետության աջակցությունն է պետք: Գ. Ծառուկյանը եզրափակեց. «Ով ասում է աշխատատեղ եմ ստեղծելու՝ սուտ է ասում»: Ծառուկյանը նաեւ քննադատեց տնտեսական ճգնաժամի պայմաններում ոռոգման ջրի սակագնի անհիմն բարձրացումը ու հավաքվածներին կոչ արեց «հոգու խորքում նայեք մարդու խոսքին ու գործին, նոր որոշում կայացրեք: Ամեն ինչ ձեր ձեռքերում է, ոչ ոքի չմեղադրեք. դուք եք ձեր ապագայի ընտրողը, եթե ձեր վեջը չի՝ էլի մեղավորը դուք եք»:
Կարդացեք նաև
Նելլի ԳՐԻԳՈՐՅԱՆ
