Երեւանի թիվ 10 ընտրատարածքում ՀՀ կենտրոնական ընտրական հանձնաժողովը չգրանցեց հայտնի գործարար Խաչատուր Սուքիասյանին որպես պատգամավորության թեկնածու, պատճառաբանելով, որ նա վերջին 5 տարիները մշտապես չի բնակվել Հայաստանում, ինչպես օրենքն է պահանջում: Նույն պատճառով ինքնաբացարկի դիմում ներկայացրեց այս անգամ ՕԵԿ-ի կողմից հանդես եկող ՀՀ կապի եւ տրանսպորտի նախկին նախարար Էդուարդ Մադաթյանը՝ ԿԸՀ-ին ազատելով անհարմար դրության մեջ հայտնվելու հեռանկարից:
Սակայն պարզվում է, որ այնուհանդերձ, ՀՀ ԿԸՀ-ն իբրեւ մեծամասնական ընտրակարգով պատգամավորության թեկնածուի գրանցել է մարդու, որը չի համապատասխանում ՀՀ օրենսդրության պահանջներին եւ վերջին 5 տարիները չի բնակվել Հայաստանում: Խոսքը թիվ 25 ընտրատարածքում մեծամասնական ընտրակարգով պատգամավորության թեկնածու գրանցված Հովսեփ Խաչիկի Գալստյանի մասին է, որը «Երեւան սպորտ» ԲԲԸ-ի գլխավոր տնօրենն է: Այդ մասին Aravot.am-ի հետ զրույցում ահազանգեցին Հրազդանի բնակիչները:
Տեղացիների պատմելով Հովսեփ Գալստյանը ժամանակին «Միավորված բանկի» կառավարիչն էր, որը «պայթելուց» հետո Հովսեփ Գալստյանը մեկնել է Հայաստանից: Տեւական ժամանակ նա բնակվել է Կիպրոսում եւ հայրենի Հրազդան է վերադարձել ընդամենը 2.5-3 տարի առաջ:
Կարդացեք նաև
Արդեն քանի օր է Aravot.am-ը փորձում է պարոն Գալստյանից՝ իր Հայաստան վերադառնալու մասին տեղեկատվությունը ճշտել, սակայն, վերջինս այդպես էլ չի պատասխանում մեր հետախոսազանգերին:
Նելլի ԳՐԻԳՈՐՅԱՆ
