Այսօր «Արմենիա Մարիոթ» հյուրանոցի Տիգրան Մեծ սրահում մեկնարկեց «Ժառանգություն» եւ «Ազատ դեմոկրատներ» կուսակցությունների միասնական նախընտրական քարոզարշավը, որին, ի թիվս հասարակական եւ քաղաքական գործիչների, ներկա էր նաեւ քաղաքական տեխնոլոգ Կարեն Քոչարյանը:
Միջոցառման ավարտին Aravot.am-ը վերջինիս խնդրեց գնահատել «Ժառանգության» քարոզարշավի մեկնարկը: Քոչարյանն ի պատասխան ասաց, որ մեկնարկը բավականին հաջող էր, ու «Ժառանգության» PR-ը լավ է կազմակերպված. «Ես մինչեւ այս էլ ինչ-որ բաներ տեսել տեսել եմ դեռ «Ժառանգության», նաեւ «Ազատ դեմոկրատների» համագումարներում, նաեւ «Ժառանգության» նախընտրական շտաբի բացման ժամանակ, ու ինձ դուր են եկել իրենց մեծադիր քարոզչական պաստառներն ու «լայքերը»: Իրենք բավականին ոչ ստանդարտ քարոզչություն են իրականացնում: Դա, իհարկե, նոր տեխնոլոգիաների կիրառում է: Նոր տեխնոլոգիան, այո, հենց դա է՝ ոչ թե կոմունիստների ժամանակներից եկող տապոռային ֆրազները, որոնք մինչեւ հիմա շարունակում են օգտագործել»:
Ինչ վերաբերում է «Ժառանգության» կարգախոսին, ապա քաղտեխնոլոգն ասաց, թե իրեն «Գալիս ենք»-ն է շատ դուր գալիս եւ անմիջապես էլ հավելեց՝ «դա շատ սուբյեկտիվ է, իհարկե»: «Սարեր ենք շարժելու» կարգախոսն էլ, Կարեն Քոչարյանի կարծիքով, Րաֆֆի Հովհաննիսյանի անձնական ընտրությունն է. «Սա իրեն սազում է, ու, միգուցե, այդ կարգախոսը Րաֆֆիի շուրթերով շատերի կողմից ընկալելի լինի»:
Գնահատելով այս պահի դրությամբ ընտրական պայքարի մեջ մտած 9 քաղաքական ուժերի թվում մասնավորապես «Ժառանգության» հաջողության հասնելու հնարավորությունը՝ քաղաքական տեխնոլոգն ասաց. «Անկեղծորեն ասեմ, անգամ այս պահի դրությամբ «Ժառանգությունը», կարծում եմ, իր հաղթանակի հասնելու շանսով երրորդն է: Նա առայժմ զիջում է միայն ՀՀԿ-ին ու ԲՀԿ-ին, ու համոզված եմ, որ ՀԱԿ-ից էլ առաջ, ՀՅԴ-ից էլ: Դե, իսկ ՕԵԿ-ից… ՕԵԿ-ի մասին մի անգամ արդեն ասել եմ՝ կամ լավը, կամ ոչինչ, իսկ ես գերադասում եմ ոչինչը»:
Կարդացեք նաև
Նաիրա ՄԱՄԻԿՈՆՅԱՆ
