Ամերիկյան ինստիտուտը Վրաստանում սահմանեց քաղաքակիրթ մրցակցության կանոններ
Այն հայտարարությունը, որով ապրիլի 5-ին հանդես եկավ ՀՀԿ գործադիր մարմնի անդամ Դավիթ Հարությունյանը՝ կուսակցության անունից առաջարկելով, թե մասնակից կուսակցությունները պետք է սահմանեն ընտրությունների պատշաճ անցկացման քաղաքակիրթ մրցակցությունն ապահովող կանոններ՝ քննադատվեց ընդդիմադիր ուժերի կողմից: Մասնավորապես նշվում էր. «Որեւէ կանոն պետք չէ, Սահմանադրությունից եւ օրենքների կատարումից ավելի լավ կանոն գոյություն չունի», «Իմաստը ո՞րն է ինչ-որ փաստաթուղթ ստորագրելու, միասնական շտաբներ ձեւավորելու, միեւնույն է, այդտեղ գրվում է այն, ինչ նախատեսվում է օրենքով», «Պետք է ոչ թե թղթեր ստորագրել, այլ գործել»:
Նշենք սակայն, որ նման կանոններ սահմանելու առումով նախադեպեր կան: 2008 թվականի մայիսի 21-ին Վրաստանում կայացած խորհրդարանական ընտրություններից առաջ՝ Ազգային ժողովրդավարական ինստիտուտի (NDI) միջնորդությամբ վրացական 9 կուսակցությունները ապրիլի 11-ին հրապարակել էին վարքագծի կանոնագիրք, որով ընտրությունների մասնակից քաղաքական ուժերը պարտավորվեցին ստանձնել պատասխանատվություն իրենց թեկնածուների, ընտրական հանձնաժողովների անդամների եւ ակտիվիստների գործունեության համար: NDI-ն էլ հետագայում անցկացնում էր դիտարկում, որ պահպանվեն վարքագծի կանոնները եւ ուսումնասիրում այդ կապակցությամբ կուսակցություններից ստացած բողոքները, նաեւ անդրադառնում մամուլում հրապարակված ահազանգերին:
Եվ սա էլ առաջին փորձը չէ: Վրացական փորձից դեռ տաս տարի առաջ էր Ժողովրդավարության եւ ընտրական աջակցության միջագզային ինստիտուտը (International Institute for Democracy and Electoral Assistance- International IDEA) մշակել համանման վարքագծի կանոններ՝ ընտրական վարչարարության էթիկական ու մասնագիտական վարքագծի կանոններ, որոնք կիրառվել են տասնյակ երկրներում:
