«Մարդու տեսակ կա , որ նամուս ունենա՝ արեւի հետ դուրս չի գա: Իմ ընտրատարածքում ամենաակտիվ ընտրակաշառք բաժանող ու անձնագրեր հավաքողը «Օրինաց երկիր» կուսակցության ներկայացուցիչներն են, բայց հենց իրենք են կոչ անում պայքարել ընտրակաշառքների դեմ»,- Aravot.am-ի հետ զրույցում ասաց ՀԱԿ անդամ Պետրոս Մակեյանը .«Եթե պետք եղավ՝ կհրապարակեմ կոնկրետ ընտրակաշառք հավաքողի անունը , գիտեմ՝ ով է հավաքել»:
Պարոն Մակեյանին շատ են զայրացրել ՕԵԿ փոխնախագահ Հեղինե Բիշարյանի՝ «պայքարել քաղաքական այն ուժերի դեմ, որոնք փողով ուզում են գնել մեր երեխաների ապագան, պայքարել ընտրակաշառքների դեմ» ու նման այլ հայտարարությունները. «Վստահ եմ, որ այսօր ընտրակաշառքի աժիոտաժ է: «Օրինաց երկիրը» իրենց վրա մնացած, փչացած, Արթուր Բաղդասարյանի գործարանի ջեմերն է բաժանում… Նրանք նույն բանն ավելի վատ ձեւով են անում, ինչ «Բարգավաճ Հայաստանն» ու Հանրապետական կուսակցությունները, բայց փորձում են կույս ձեւանալ: Լավ հայտարարում են՝ 170.000 անդամ ունեն, վաղը, որ 17.000 ձայն չհավաքեցին, ինչ են ասելու՝ որտե՞ղ է իրենց 170.000-ը»:
Պարոն Մակեյանը նաեւ անդրադարձավ ընտրացուցակների ուռճացված թվերին ու դրա մեջ մեղադրեց իշխանություններին: Նա նաեւ ասաց, թե կեղծված ընտրացուցակների դեմ ինչպես է պայքարելու ՀԱԿ-ը: Մանրամասները՝ տեսանյութում:
Արփինե ՍԻՄՈՆՅԱՆ
