Բլոգեր Տիգրան Քոչարյանը, որը նաեւ ակտիվ է Facebook սոցցանցում, «Առավոտի» հետ զրույցում կարծիք հայտնեց, թե՝ ԱԺ առաջիկա ընտրությունները լինելու են Հրազդանի նման ընտրություններ՝ առանց բռնի ուժի կիրառման: Մեր հարցին, թե՝ դա բավարարո՞ւմ է մեզ՝ քաղաքացիներիս, արձագանքեց. «Եթե ռադիկալ հայացքով նայենք՝ ոչ, չի բավարարում: Բայց եթե էվոլյուցիոն գործընթացների համատեքստում նայենք՝ բավարարում է: Դա կարող է լինել ոչ թե դիտորդների ասելով՝ «մեկ քայլ առաջ», այլ բավականին մեծ քայլերով առաջընթաց, որովհետեւ երբ մարդիկ մի ամբողջ 20 տարի մշակույթ են ձեւավորել բռնի ուժով, առնելով, ծեծելով, լցոնումներով ընտրություններ անցկացրել, ապա Հրազդանը, իսկապես, մի քանի քայլ առաջ է: Հիմա ես մարդիկ գիտեմ, ովքեր շոկի մեջ են, չգիտեն՝ ի՞նչ անել, որովհետեւ նախկինում հենց այդ մեթոդներով են ընտրություններ արել: Այդ մարդիկ, այդ մեթոդներն արդեն վերանում են»:
«Առավոտ» օրաթերթ
