Բաքվում կայացած «Եվրանեսթ»-ի վեհաժողովում հայ պատվիրակների` իբր ննջելու մասին ադրբեջանական լուրերը հայաստանյան լրատվական միջավայրը «ներծծեց» կայծակնային արագությամբ ու ջերմեռանդությամբ, որ Ադրբեջանից նոր-նոր վերադարձած հայաստանյան պատվիրակներն առավել կարեւոր հարցերը թողած` սկսեցին ակամա արդարանալ, հակառակ հիմնավորումներ, բացատրություններ ներկայացնել:
Որ սովոր ենք ադրբեջանական տեղեկատվական խայծերը, հերյուրանքներն ու «պրովոկացիան» հալած յուղի տեղ ընդունել, դրանք լուրջ ու խորքային վերլուծությունների նյութ դարձնել, եւ որ այդ ախտից դեռեւս չենք թոթափվել, հայտնի էր վաղուց: Բայց նման հիմարություններին տոն տալը, քննարկման առարկա դարձնելը, կներեք, արդեն շատ ավելի մեծ հիմարության է նման:
Եվ այստեղ պատվիրակների ով լինելը ոչ մի կապ չունի: Այդ տեղեկությունները շրջանառության մեջ դնողները նախ պետք է իրենք իրենց հարց տային. եթե անգամ մի քանի գիշեր արթուն լուսացրած լինեին` կարո՞ղ էին աչք փակել Բաքվում, այն էլ նման մակարդակի միջոցառման եւ նման ծանր մթնոլորտում:
Կարդացեք նաև
Երբ նման կարգի ինֆորմացիան է դառնում հանրային քննարկումների թեմա, նշանակում է` ոչ միայն լրագրողական պրոֆեսիոնալիզմի հետ լուրջ խնդիրներ ունենք, այլեւ բանականության: Իսկ դա արդեն խնդիր չէ, այլ հիվանդություն:
«Երկիր»
