Այսօր կայացած նիստում թիվ 2 ընտրատարածքային ընտրական հանձնաժողովը միաձայն քվեարկությամբ մերժեց մեծամասնական ընտրակարգով թիվ 2 ընտրատարածքում առաջադրված ԱԺ պատգամավորի թեկնածու Սամվել Ֆարմանյանի նախընտրական շտաբի ներկայացրած բողոքը, որով վերջինս մեղադրում էր նույն ընտրատարածքում առաջադրված մեկ այլ թեկնածուի` Վլադիմիր Կարապետյանին` նախընտրական քարոզարշավը դեռ չսկսված, նախընտրական քարոզչություն իրականացնելու մեջ:
Ըստ բողոքաբերների` Վ. Կարապետյանը, ընտրություններին մասնակցելու կոչ պարունակող եւ ընտրատարածքի բնակիչների հետ ծանոթանալու ցանկություն արտահայտող թռուցիկներ տարածելով` խախտել է Ընտրական օրենսգիրքը: Իսկ հակառակ կողմը` հանձին Վլ. Կարապետյանի ներկայացուցիչ Պատվական Հովակիմյանի, պնդում էր, որ այդ թռուցիկում չկան քարոզչություն պարունակող տարրեր, հետեւաբար դա չի կարող համարվել քարոզչություն:
Քննարկման ընթացքում Սամվել Ֆարմանյանի ներկայացուցիչը պնդում էր, որ այդ թռուցիկները` Վլ.Կարապետյանի լուսանկարով, փակցված են եղել Նոր-Նորքի 8-րդ, 9-րդ զանգվածների բնակարաններին, բաժանվել են փողոցներում, եւ «անգամ Սամվել Ֆարմանյանի բնակարանին են փակցրել»: ԿԸՀ անդամներից մեկը, որ նույնպես 9-րդ զանգվածի բնակիչ էր, ասաց, որ իրենց շենքում չեն եղել այդ թռուցիկներից, իսկ Սամվել Ֆարմանյանն էլ կարծես թե «երրորդ մասում» է բնակվում:
Քննարկման ավարտին ԸԸՀ նախագահ Գուրգեն Խաչատրյանը` Գիտելիքների թեստավորման կենտրոնի նախկին նախագահը, ձայնը տվեց ԸԸՀ իրավաբանին, որը հենվելով ԸՕ 18 –րդ հոդվածի վրա, պնդում էր, որ Վլ.Կարապետյանը «իրավունք ուներ» թռուցիկ բաժանելու:
Կարդացեք նաև
Հանձնաժողովը միաձայն որոշեց մերժել դիմումը եւ վարույթ չհարուցել:
Գուրգեն Խաչատրյանը Ֆարմանյանի շտաբի ներկայացուցիչներին տեղյակ պահեց, որ եթե նրանք համաձայն չեն ԸԸՀ որոշման հետ, կարող են բողոքարկել այդ որոշումը` Կենտրոնական ընտրական հանձնաժողովին:
Մելանյա ԲԱՐՍԵՂՅԱՆ
