Քիչ առաջ ՀՀ վարչական դատարանը մերժել է թիվ 19 ընտրատարածքում պատգամավորության թեկնածու առաջադրված նախկին պատգամավոր Հակոբ Հակոբյանի հայցն ընդդեմ նույն ընտրատարածքում գործող պատգամավոր Սեյրան Սարոյանի գրանցման, որպես պատգամավորության թեկնածուի: Հիշեցնենք, որ վերջինիս սատարում է ՀՀԿ-ն:
Հակոբ Հակոբյանը կարծում է, որ Սեյրան Սարոյանին գրանցելու իրավունքն ԸԸՀ-ն եւ ԿԸՀ-ն չունեին, քանի որ վերջինս իր պատգամավորական գործունեության 5 տարիներից 2 տարի 7 ամիսն անցկացրել է արտերկրում՝ կառավարելով իր բիզնեսները: Վկայակոչելով հայտնի գործարար Խաչատուր Սուքիասյանին չգրանցելը որպես պատգամավորության թեկնածուի, Հակոբյանը կարծում է, որ օրենսդրական անհստակության պատճառով պետական մարմինները օրենքի կամայական մեկնություններ են անում՝ մի դեպքում Սուքիասյանին չգրանցելով, մյուսում՝ Սարոյանին գրանցելով:
Aravot.am-ի հետ զրույցում Հակոբ Հակոբյանն ասաց, որ ինքը պատրաստվում է այս հարցը վիճարկել Սահմանադրական դատարանում, անհրաժեշտության դեպքում, նաեւ Մարդու իրավունքների եվրոպական դատարանում:
Նելլի ԳՐԻԳՈՐՅԱՆ
