Միասնական շտաբի ձեւավորման հեռանկարը չափազանց մշուշոտ է: Հռչակագիրն ավելի շուտ ցանկությունների բացիկ է, քան լուրջ փաստաթուղթ:
Հենց այնպես ասել, թե շտաբը պետք է բացահայտի եւ արձանագրի ընտրակեղծիքներն ու խախտումները, համաձայնեք, իրատեսական չէ:
Եվ հետո, իսկ ինչո՞վ են զբաղվելու միջազգային ու տեղական դիտորդները: Եթե նշված չորս քաղաքական ուժերը որոշել են դիտորդական առաքելություն ստանձնել, ապա պետք է հրաժարվեն ընտրապայքարից, գրանցվեն որպես դիտորդական առաքելություն իրականացնող կառույց: Բայց դրա համար սահմանված ժամկետներն արդեն լրացել են:
Իսկ եթե ավելի լուրջ, ապա պետք է նկատել, որ միասնական շտաբ ձեւավորելու ցանկություն են դրսեւորում այնպիսի քաղաքական ուժեր, որոնք մինչեւ երեկ միայն մրոտում էին իրար։ Խոսքը մասնավորապես ՀԱԿ-ի եւ «Ժառանգության» մասին է:
Իսկ եթե նկատի առնենք եւ այն, որ մեծամասնական ընտրակարգով 41 ընտրատարածքների մեծ մասում այս չորս ուժերը թեկնածուներ են առաջադրել միմյանց դեմ, կարելի է ասել, որ նրանցից յուրաքանչյուրը դիմացինին համարում է մրցակից:
Կիմա ԵՂԻԱԶԱՐՅԱՆ
«Հայոց աշխարհ»
