«Լոռվա ձոր» հայրենակցական միության նախաձեռնությամբ, այսօր՝ մարտի 3-ին, Ավետիք Իսահակյանի անվան գրադարանում կայացավ Վահե Անթանեսյանի «Լոռվա ժպիտներեր» գրքի շնորհանդեսը:
Շնորհանդեսին բացման խոսքով հանդես եկավ «Լոռվա ձոր» հայրենակցական միության նախագահ Սերգո Երիցյանը: Նա գտնում է, որ նման ժողովածուների հրատարակումը կարեւոր է. «Կարծում եմ սա այն դեպքն է, երբ ամեն մեկը պետք է փորձի ժողովածուն ընթերցել, այնտեղ անթեղված հումորը հասկանալ կամ չհասկանալ, ընկալել կամ չընկալել: Այս ժպիտները վկայում են, որ դրանք պարզապես անհրաժեշտ են հավաքել, ժողովել եւ հանձնել սերունդներին»:
Գրքում զետեղված են երկար տարիների բանահավաքչական աշխատանքների արդյունքում գրի առնված անեկդոտները Լոռու եւ լոռեցիների մասին:
Գրքի հեղինակ՝ Վահե Անթանեսյանը հավաստիացնում է, որ այն շարունակական բնույթ է կրելու. «Դեռ շատ հումորներ կան թղթին չհանձնած: Պետք է պրպտել, մշակել եւ ներկայացնել»,-ասում է նա:
Ողջույնի խոսքով հանդես եկավ հումորիստ, ժողովրդական արտիստ Աշոտ Ղազարյանը: Նա հանդիսականներին ներկայացրեց մի քանի անեկդոտներ ոչ միայն լոռեցիների, այլեւ ապարանցիների եւ զոքանչ մայրերի մասին: «Այսօր մարդկանց լացացնելը շատ հեշտ է, դժվարը ժպիտ պարգեւելն է»,-նկատում է նա:
Մեջբերենք հնչած մի քանի հումորներ, որով մարմնավորվում է լոռեցու կերպարը.«Հեր ու տղա ուշ ժամի գնում են գերեզմանոց: Որդու սիրտն ահ է ընկնում, հորն ասում է.
-Այ հե՛ր, վախում եմ:
-Շան տղա՛, ընչի՞ց ես վախում, սաղ մեր գյուղացի են», «Մի օտարական աքորվեցուց հարցնում է, թե գյուղում բարձրանալու համար կարո՞ղ է այս ճանապարհով գնալ:
-Մեր բարձած էշը գնում ա, դու խի՞ չես կարա,-զարմանում է աքորվեցին»,
«Աիդային հարցրին.
-Աղջի՛, էդ ու՞մ ես գցել տհենց շաշ, ախր մերդ խելոք կնիկ ա:
-Խու մենակ մերս չի, ըրանքին հեր էլ կա է.. » եւ նմանատիպ մի շարք լոռեցուն բնորոշ հումորներ:
Բանաստեղծ Լիպարիդ Սարգսյանի խոսքով, այն ինչ արված է եւ այն ինչ ներառված է գրքում, հետաքրքիր է եւ ողջունելի. «Հայկական ամեն մի բնաշխարհ, ամեն մի անկյուն, ամեն գյուղ իր գեղեցկությունն ունի: Եվ այստեղ անժխտելի է Լոռվա բնաշխարհի հարստությունն ու ներդաշնակությունը»,-ընդգծում է նա:
Հնչեցին մի քանի կատարումներ գուսան Զաքարյանի ստեղծագործություններից: Երգչուհի Անահիտ Սարգսյանի ակապելա կատարումը հուզեց ներկաներին: «Լոռվա ձոր» հայրենակցական միության նախագահ Սերգո Երցյանն առաջարկեց հաջորդ հանդիպումը նվիրել գուսան Սարգիս Զաքարյանի 88-ամյակին:
Քրիստինա Միրզոյան
