Նար-Դոսի 29 հասցեում վարձակալությամբ բնակվող Հմայակ Հովհաննիսյանը, ի նշան բողոքի, որ իրեն «անտեղի են դատապարտում», բերանը թել ու ասեղով կարել էր եւ շուրջ 1 շաբաթ հացադուլ արել: Հաշվի առնելով, որ նա բուժում է ստանում, բերանի վրա միայն մի փոքր անցք էր թողել` դեղերն ընդունելու համար: Այժմ նա արդեն քրեակատարողական հիմնարկում է, եւ ինչպես ընկերները Aravot.am-ին պատմեցին, ծայրահեղ ծանր վիճակում: Օրինապահ մարմինները ստիպել են բերանի կարերը քանդել ու նրան ձերբակալել են` թմրամիջոցներ օգտագործելու մեղադրանքով: Բացի այդ, Հմայակի մոտից նաեւ հայտնաբերել էին սառը զենք` դանակ:
Ինքը` Հմայակը վստահեցնում էր, որ դանակը վերցրել է կնոջ մոտ հիվանդանոց տանելու եւ միրգ կտրելու համար, իսկ թմրամիջոցներ օգտագործել է՝ հիվանդության անասելի ցավերը մեղմելու նպատակով:
Երբ Հմայակ Հովհաննիսյանը բերանը կարել էր` այդ մասին մեր հրապարակումից հետո, ՄԻՊ-ի գրասենյակից հետաքրքրվեցին եւ խոստացան քաղաքացուն օգնել: Սակայն Հմայակի ընկերները վստահեցրին, որ ՄԻՊ-ը ոչ մի բանով էլ չի օգնել. «2.5 տարի էին տվել` սրոկը էդքան էլ մնաց: Հիմա նա շատ վատ է, ծայրահեղ վիճակում է, դեղերը ստանում է, բայց արդեն չեն օգնում: Վատն այն է, որ կինն էլ է հիվանդ, իսկ ինքը կնոջ միակ խնամողն էր, հիմա երկուսն էլ տանջվում են: Եթե վտանգավոր հանցագործ լիներ` կասեինք հա, բայց հիվանդ մարդիկ են, ո՞ւմ են վնաս տալու, եթե ազատության մեջ լինեն»:
Կարդացեք նաև
Հռիփսիմե ՋԵԲԵՋՅԱՆ
