Օլիմպիական վարկանիշների համար պայքարում են ոչ միայն մարզիկները, այլեւ` մրցավարները: Եվ երկրորդի պարագայում պայքարն իր սրությամբ ոչնչով չի զիջում առաջինին: Մարտի 27-ին ըմբշամարտի մրցավար Սամվել Հարությունյանը պաշտոնապես իրազեկվել է, որ ՄՕԿ-ը իրեն ընդգրկել է աշխարհի 60 այն մրցավարների վերջնական ցուցակ, որոնց վստահել է սպասարկել Լոնդոնի օլիմպիական խաղերը:
Լավագույններին ՄՕԿ-ն ընտրել է աշխարհի վերջին երիտասարդական ու Եվրոպայի մեծահասակների առաջնությունների արդյունքով` մանրազնին ուսումնասիրելով էքստրա մրցավարների գործողությունները գորգում: Հայ մասնագետը, որ աշխատել է նաեւ Պեկինի օլիմպիական խաղերում, այս անգամ էլ պատվով է անցել մրցույթները եւ այժմ նախապատրաստվում է Լոնդոնի օլիմպիական խաղերին:
«Հավատացեք` հեշտ չէ, երբ գիտես, որ գորգում քո ամեն մի ժեստին, կամ սուլիչին իրավասու անձանց հազար աչք է հետեւում: Երեւի իմ մասնագիտական գիտելիքներն ու փորձը բավարարել են նրանց պահանջները: 2012 թվականն ինձ համար նշանավորվեց երկու բանով. փետրվարի սկզբներին զույգ տղա թոռ ունեցա, իսկ օրերս էլ տեղեկացա, որ սպասարկելու եմ օլիմպիական խաղերի ըմբշամարտի մրցաշարերը», – ասաց Հայաստանից առայժմ միակ օլիմպիական մրցավարը Aravot.am-ին:
Կարդացեք նաև
Աշոտ ՀԱԿՈԲՅԱՆ
