Լոռու մարզի ընդհանուր իրավասության դատարանը, դատավոր Մուշեղ Հարությունյանի նախագահությամբ, 4,5 տարվա ազատազրկման է դատապարտել շարունակաբար, միասնական դիտավորությամբ կենսաթոշակառուների գումարները յուրացնելու, առեւտրային կաշառք ստանալու եւ պաշտոնական փաստաթղթեր կեղծելու եւ օգտագործելու մեջ մեղադրվող վանաձորցի Շողիկ Վարդումյանին (լուսանկարում):
Դատարանը վանաձորցի կնոջը, սակայն, անմեղ է ճանաչել պաշտոնական փաստաթղթեր կեղծելու եւ օգտագործելու մեղադրանքում, առեւտրային կաշառք ստանալու համար էլ դատապարտել է մեկ տարվա ազատազրկման եւ, կիրառելով համաներման ակտը, նրան ազատել է պատժի կրումից:
Ըստ մեղադրական եզրակացության՝ 47-ամյա Շողիկ Վարդումյանը, աշխատելով «Հայփոստ» ՓԲ ընկերության Վանաձորի փոստային բաժանմունքի պետի պաշտոնում, շարունակաբար, միասնական դիտավորությամբ, 2007թ. հոկտեմբերից մինչեւ 2010թ. սեպտեմբեր ամիսն ընկած ժամանակահատվածում, իր պաշտոնեական դիրքն օգտագործելով, յուրացման եղանակով հափշտակել է կենսաթոշակառուների առանձնապես խոշոր չափերով՝ 3. 739. 291 ՀՀ դրամ կենսաթոշակային գումարները:
Շողիկ Վարդումյանի պաշտպան Գուրգեն Հարությունյանն ասում է. «Յուրացման մասին որեւէ խոսք լինել չի կարող: Յուրացումը կատարվում է ուղղակի դիտավորությամբ, երբ մարդը տնօրինության ու տիրապետության տակ գտնվող գույքը յուրացնում է շահադիտական նպատակով, օտարում է որեւէ կերպ մյուսից ու չի ցանկանում վերադարձնել, նպատակ էլ չունի վերադարձնելու: Ամբողջ դատաքննության ընթացքում նույնիսկ տուժողները չկարողացան թաքցնել այն փաստը, որ իրենք են խնդրել իրենց գումարները պահել: Իմ պաշտպանյալն էլ երբեք չի հրաժարվել այդ գումարները վերադարձնելուց»:
Ավելին, Շողիկ Վարդումյանն ինքը նախաքննական մարմնին ներկայացրել է այնպիսի տեղեկություններ, որոնք մինչ այդ հայտնի չեն եղել, մասնավորապես՝ այն թոշակառուների անուն-ազգանունները, որոնցից ինքը գումարներ է վերցրել:
«Ոչ մի ապացույց չկա, որ նա այդ թոշակները օրինական հիմքերով չէ իր տիրապետության տակ առել, որ նա այդ թոշակները վերադարձնելու մտադրություն չի ունեցել»:
Պաշտպանը պնդում է, որ դատարանի կայացրած վճռը պատճառաբանված չէ, նրանում բացակայում են շարունակաբար, միասնական դիտավորությամբ կենսաթոշակառուների գումարները յուրացնելու մեղավորության իրավական վերլուծությունները:
«Միասնական դիտավորության մասին գոնե մեկ ապացույց չկա: Հանցագործություն կատարելու շարժառիթը բացակայում է»,- ասում է Հարությունյանը:
Ըստ նրա՝ սա ընդամենը «սարքովի գործ» է, որ նախաքննությունը միակողմանի է ընթացել, խախտումներով: Նախաքննական մարմինն էլ քրեական գործ է հարուցել նաեւ այս գործում ներգրավված տուժողներից 5-6-ի լիազորագրերով, ովքեր երբեւէ չեն հարցաքննվել ո՛չ նախաքննության, ո՛չ դատաքննության ընթացքում:
«Անձին ապօրինի մեղադրանք են առաջադրում՝ քաղաքացիաիրավական հարաբերությունների համար: Որ այդպես լինի, ամբողջ Հայաստանը կդատվի: Մարդը բանկից փող է վերցնում, չի կարողանում տալ, եղավ յուրացո՞ւմ»,- կասկած է հայտնում պաշտպան Հարությունյանը:
Համաձայն կայացված դատավճռի՝ բացի ազատազրկումը, Շողիկ Վարդումյանից հօգուտ կենսաթոշակառուների պիտի բռնագանձվի ընդհանուր առմամբ 3. 739. 291 ՀՀ դրամ:
Վանաձոր
«Առավոտ» օրաթերթ
