Տավուշի մարզպետ Արմեն Ղուլարյանը մարտի 24-ին թիվ 36-Ա որոշմամբ, մինչեւ մրցույթով տնօրենի թափուր պաշտոնը զբաղեցնելը, մարտի 26-ից «ՀՀ Տավուշի մարզի Ոսկեպարի միջնակարգ դպրոց» պետական ոչ առեւտրային կազմակերպության գործադիր տնօրենի պաշտոնակատար է նշանակել նույն դպրոցի ուսուցիչ Հարություն Ալավերդյանին եւ նրա հետ կնքել աշխատանքային պայմանագիր: Ոսկեպարի միջնակարգ դպրոցի նախկին տնօրեն Նվեր Բեգլարյանն ասում է , որ մարզպետի որոշումն անօրինական է, քանի որ Հարություն Ալավերդյանը դպրոցի կառավարման խորհրդի նախագահն է, որ դա «Պետական հանրակրթական ուսումնական հաստատության տնօրենի ընտրության (նշանակման) կարգը հաստատելու մասին» կառավարության որոշման խախտում է: Պարզաբանման համար դիմեցինք Տավուշի մարզպետարանի կրթության վարչության պետ Աշոտ Փաշինյանին: Նա ասաց, որ Հարություն Ալավերդյանը դպրոցի կառավարման խորհրդի կազմից դուրս գալու համար դիմում է գրել: Սակայն փաստն այն է, որ դպրոցի կառավարման խորհուրդն այդ առթիվ նիստ չի գումարել, եւ Հարություն Ալավերդյանը դեռեւս դպրոցի կառավարման խորհրդի նախագահն է: 12 տարի որպես մարզպետ պաշտոնավարող մարզպետ Արմեն Ղուլարյանը պիտի որ իմանար մարզպետարանի ենթակայության ներքո գտնվող հանրակրթական դպրոցների տնօրենների պաշտոնակատարների նշանակման կարգը:
Ոսկան ՍԱՐԳՍՅԱՆ
