ԱԺ ԲՀԿ-ական փոխնախագահ Սամվել Բալասանյանը շարունակում է իր նախընտրական բարեգործությունները Շիրակի մարզի գյուղերում: Ախուրիկում, Ղարիբջանյանում, Երազգավորսում, Բայանդուրում ՀՀԿ-ական գյուղապետերի ձեռքով գարի բաժանելուց հետո այսօր հերթը հասավ Շիրակի մարզի ամենամեծ գյուղին` Ախուրյանին:
Ինչպես պատմում են ականատեսները, մեկ ժամ առաջ գյուղամիջում մարդասպանություն էր. գյուղացիները, լսելով գարու մասին, անձնագրերը ձեռքներին գյուղի ծայրերից շնչակտուր վազում էին ու միմյանց հրմշտելով, վիրավորելով փորձում էին վայրկյան առաջ հասնել գարի բաժանող բեռնատարին:
Ըստ ականատեսների, մեկ անձնագիրը մեկ պարկ գարի է, իսկ մարդկային կուտակումների պատճառը եղել է այն, որ գարին բաժանվել է ըստ ընտրացուցակների, այսինքն ճշգրտել են տվյալ անձը ձայն ունի՞, թե՞ ոչ: Նշենք, որ մյուս գյուղերում նման ճշգրտումներ չեն կատարվել, որի արդյունքում էլ պարարտանյութը հասել է ում պատահի, նույնիսկ պակասորդ է տվել:
Aravot.am-ը պատգամավորի թեկնածու, Ախուրյանի դաշնակցական գյուղապետ Արծրուն Իգիթյանից հետաքրքրվեց, թե դու՞ք եք բաժանում Սամվել Բալասանյանի գարին: «Դուք երբևէ տեսե՞լ եք, որ ես ինչ–որ բան բաժանեմ, ես բաժանելուց հեռու եմ, առավել ևս ուրիշի ապրանքը բաժանելուց: Իրենք գիտեն, որ ես չեմ զբաղվում այդ հարցերով, դրա համար էլ ինձ չեն մոտեցել»,- նեղսրտեց դաշնակցական գյուղապետը:
Կարդացեք նաև
Ի դեպ, հենց նոր ահազանգ ստացանք, որ պարարտանյութը սպառվելուց հետո, բեռնատարը, գարու նոր պարկերով ծանրաբեռնված, նորից գյուղամեջ է մտել:
Նունե ԱՐԵՎՇԱՏՅԱՆ
