«Բարգավաճ Հայաստան» կուսակցության նախագահ Գագիկ Ծառուկյանն երեկ ընդունել է ԵԱՀԿ Ժողովրդավարական հաստատությունների և մարդու իրավունքների գրասենյակի (ԵԱՀԿ/ԺՀՄԻԳ) երկարաժամկետ դիտորդական առաքելության ղեկավար Ռադմիլա Շեկերինսկային: Ըստ ԲՀԿ պաշտոնական կայքէջի՝ Ռադմիլա Շեկերինսկան նշել է. «Խորհրդարանական ընտրություններին ընդառաջ մենք հանդիպում ենք բոլոր այն խոշոր քաղաքական կուսակցությունների հետ, որոնք առանցքային մասնակցություն են ունենալու ընտրությունների ժամանակ: ԵԱՀԿ անդամ պետությունները գտնում են, որ դիտորդական առաքելությունը բարձրացնում է ընտրությունների արդյունքների հանդեպ հանրության վստահության մակարդակը: Մենք շահագրգռված ենք, որ Հայաստանում անցկացվեն անկողմնակալ և անաչառ ընտրություններ»:
«Մենք ևս շահագրգռված ենք, որ անցկացվեն բաց, թափանցիկ և արդար ընտրություններ: Այս նպատակին հասնելու համար մենք պատրաստ ենք համագործակցել բոլոր այն քաղաքական ուժերի հետ, որոնց համար ևս անկողմնակալ ընտրությունների անցկացումն առաջնայինն է», – ողջունելով Ռ. Շեկերինսկային՝ ընդգծեց Գագիկ Ծառուկյանը:
