Ոստիկանության անձնագրերի և վիզաների վարչությունը հայտնաբերել է Երևանի Գարեգին Նժդեհի թիվ 35 շենքի 11-րդ բնակարանում 101 մարդ գրանցած բնակարանի սեփականատիրոջը։ Նա բնակվում է Ֆրանսիայում: Tert.am –ին այս մասին ասաց Անձնագրերի և վիզաների վարչության պետ Հովհաննես Քոչարյանը:
«Մեզ հաջողվեց սեփականատիրոջ հարազատների միջոցով նրա հետ կապ հաստատել և պարզաբանումներ պահանջել, ինչից հետո նա ցանկություն հայտնեց բոլորին՝ իր բնակարանի հաշվառումից հանելու մասին»,-ասաց Հովհաննես Քոչարյանը:
Վերջինիս խոսքով՝ սեփականատիրոջ լիազորագիրն արդեն ստացված է, և տվյալ 100 անձինք արդեն հանված են հաշվառումից: Բնակարանի սեփականատիրոջ անունը ոստիկանությունից չեն հայտնում, քանի որ այդ անել լիազորված են միայն նրա համաձայնության դեպքում:
Ըստ Հովհաննես Քոչարյանի՝ այս բնակարանում գրանցվածների վերաբերյալ ուսումնասիրություն անելու հանձնարարական ստացել են ոստիկանապետ Վլադիմիր Գասպարյանից:
Կարդացեք նաև
Ի պատասխան հարցի, թե տանտիրոջից բացատրություններ չե՞ն պահանջել այն մասին, թե ինչ հանգամանքներում է 100 հոգու գրանցել իր բնակարանում, Անձնագրերի և վիզաների վարչության պետն ասաց. «Պարզաբանումների անհրաժեշտություն … էդպես հատուկ շարժառիթները չնշեց, բայց մենք հասկանում ենք, որ նա չարաշահել է սեփականատիրոջ իր իրավունքը»:
Հարցին, թե չե՞ն գտնում, որ այստեղ կոռուպցիոն ռիսկ կա, այսինքն՝ տանտերը գումար է աշխատել, Անձնագրերի և վիզաների վարչության պետն ասաց՝ «կարող է և աշխատել է», իսկ երբ ճշգրտեցինք, թե այս փաստը ոստիկանությանը չի՞ հետաքրում, ասաց. «Եթե Ֆրանսիայում գտնվող քաղաքացին ասեր, որ աշխատել է, ի՞նչ էինք անելու»:
Մեր զրուցակիցը ավելացրեց, որ եթե հանցակազմի հատկանիշներ ի հայտ գան, ապա գործին անպայման ընթացք կտան, բայց այս պահին խնդիրն այլ է եղել՝ հաշվառումից հանել տալ այս անձանց: Այսինքն՝ դա հնարավոր է եղել միայն սեփականատիրոջ գրավոր հայտարարության հիման վրա և ոչ ոստիկանության լիազորությունների շրջանակում:
Նշենք, որ Հովհաննես Քոչարյանը մամուլին տված հարցազրույցում ավելի վաղ նշել էր, որ օրենքը քաղաքացուն չի արգելում ցանկացած քանակի մարդ հաշվառել, չնայած, չարաշահել է այդ իրավունքը։
Այնուամենայնիվ կա ողջախոհության կանխավարկած, և հետևաբար, վատ չէր լինի, որ Ոստիկանությունը նման լիազորություն ունենալու դեպքում հանդես գար օրենսդրական նախաձեռնությամբ, որով կարգելվեր կամ գոնե կսահմանափակվեր այդ քանակով մարդկանց գրանցումը մեկ բնակարանում:
Ի պատասխան, Հովհաննես Քոչարյանն ասաց. «Ողջախոհությունը, ցավոք սրտի, միշտ չէ, որ իրավական նորմերից է բխում, և սա մի երևույթ էր, որը ուսումնասիրությունների պատճառ պետք է դառնա: Ես այս պահի դրությամբ չէի ասի, թե ինչ որ նախաձեռնությամբ հանդես ենք գալու, բայց մենք վերլուծելու ենք պատճառները, շարժառիթները: Եվ շատ հնարավոր է, որ ոստիկանությունը հանդես գա իրավաստեղծ նախաձեռնությամբ՝ փորձելով իրավական մեխանիզմներ ներդնի սեփանակատերերի կողմից իրենց այս իրավունքների չարաշահումները կանխելու ուղղությամբ»:
