Ոստիկանության Նորք-Մարաշի տարածքային բաժանմունք բերված, այնուհետև Նորքի հոգեբուժական հիվանդանոց տեղափոխված Երվանդ Կարապետյանը ժամը 18:00-ի սահմաններում ազատ է արձակվել: Ոստիկանությունը գրությամբ դիմել էր հոգեբուժարանին՝ միջնորդելով ընդունել Երվանդ Կարապետյանին հոգեբուժարան՝ «բուժվելու նպատակով»:
Հոգեբուժարանի բժիշկները Երվանդի և ոստիկանների հետ խոսելուց հետո նախ զարմանք հայտնեցին, թե ինչի՞ց են ոստիկանները եզրակացրել, որ նա հոգեկան հիվանդ է: «Դե, ահազանգ եղավ, պարտավոր էինք ստուգել»,- պարզաբանեց ոստիկաններից մեկը, ով հրաժարվեց ներկայանալ:
Բժիշկների՝ երեք հոգուց բաղկացած հանձնաժողովը եզրակացություն գրեց այն մասին, որ հոգեկան շեղման որևէ ախտանիշ չեն տեսնում և Երվանդ Կարապետյանը հասարակության համար վտանգ չի ներկայացնում: Հետո այդ թուղթը ոստիկանները տարան պատճենահանելու և հետ չբերեցին: «Անհետացավ» թե՛ բժիշկների գրած եզրակացությունը, թե՛ այն փաստաթուղթը, որի հիման վրա Ե.Կարապետյանին ուղարկել էին հոգեբուժարան:
Մոտ երկու ժամ անց, հոգեբուժարանում հավաքված մի խումբ իրավապաշտպանների բարձրացրած աղմուկից հետո կորած եզրակացությունը «հայտնվեց», և փոխգնդապետ Հակոբյանն ասաց, որ Երվանդ Կարապետյանը կարող է տուն գնալ: Նա Կարապետյանին չտրամադրեց իր առողջության վերաբերյալ բժիշկների կազմած եզրակացության պատճեն, նույնիսկ թույլ չտվեց կարդալ: «Կդիմեք ոստիականություն, կտան, կծանոթանաք»,- ասաց փոխգնդապետ Հակոբյանը և հեռացավ:
