Ազգային ժողովում ՀՀ նախագահ Սերժ Սարգսյանի մշտական ներկայացուցիչ Գառնիկ Իսագուլյանն այսօր պատասխանելով լրագրողների հարցերին, թե ինչպես է վերաբերում, որ ՀՀԿ ցուցակում տեղ են գտել մարդիկ, որոնք ժամանակին քննադատում էին երկրի նախագահին, խորհուրդ տվեց հիշել առաջին նախագահ Լեւոն Տեր Պետրոսյանի ճառերը ու կոչ արեց առհասարակ քննադատությունը թշնամություն չդիտարկել.« Հիշեք Տեր Պետրոսյանը ինչ կերպարանափոխություն ստացավ երկխոսության ընթացքում, հիմա անցավ նորից սուր քննադատության: Նորմալ երեւույթներ են»:
Պարոն Իսագուլյանը նաեւ կարծիք հայտնեց, որ խորհրդարանական ընտրություններից հետո հետընտրական զարգացումներ են լինելու, որովհետեւ , ըստ նրա, ընդդիմության կեցվածքը ուղղված չէ սոսկ ընտրություններին մասնակցելուն. «Չի բացառվում, որ ընդդիմությունը հետընտրական շրջանը հեղափոխության եւ արտահերթ նախագահական ընտրությունների համար օգտագործի»:
Հետընտրական հնարավոր զարգացումների մասին ՀԱԿ անդամ Պետրոս Մակեյանը Aravot.am-ին ասաց, որ եթե նույն դասական ոճով ընտրությունները ընթանան, ընդդիմությունը հասարակությանը կուղղորդի ու հաստատ գործընթացները կգնան այդ հարթության վրա. «Հետընտրական զարգացումները սովորաբար լինում են այն երկրներում, որտեղ հասարակությունը հստակ գիտակցում է, որ ընտրությունները կեղծված են… Այսօր Հայաստանում իշխանությունների վերջին երեք օրվա ցուցակների հրապարակումից երեւում է, որ ընտրությունները կեղծելու հստակ նպատակ ունեն: Որ հետընտրական զարգացումները չլինեն, իշխանությունները մեկ ամիս ժամանակ ունեն»:
Կարդացեք նաև
Ինչ վերաբերում է ՀՀ նախագահի ԱԺ-ում մշտական ներկայացուցչի հայտարարությանը՝ Տեր Պետրոսյանի կերպարանափոխության մասով՝ պարոն Մակեյանը դա անլուրջ համեմատություն համարեց. «Դա իշխանական քարոզչամեքենան է, որ տեսեք՝ ՀԱԿ-ը իր մոտեցումները, հռետորիկան փոխել է: Իշխանությանը, որ պահին պետք է՝ իր սազանդարները սկսում են երգել, կապ չունի իրականության հետ»:
Արփինե ՍԻՄՈՆՅԱՆ
