Խորհրդարանական ընտրություններին մասնակցող քաղաքական կուսակցությունների մեծ մասն արդեն ներկայացրել է իր քաղաքական ծրագրերը: Այդ ծրագրերում, ինչպես ամեն տարի, թեև ոչ ծավալուն, բայց անդրադարձ կա նաև գիտության ոլորտում գոյություն ունեցող խնդիրների վերաբերյալ լուծումների ճանապարհներին:
Քաղաքական տարբեր ուժեր երբեմն դիվիդենդներ շահելու համար բավականին ընդդիմադիր դիրքերից խոսում են գիտության ոլորտում գոյություն ունեցող ֆինանսավորման սղության և այլ խնդիրների վերաբերյալ: Եվ այդ ուժերը ոչ միայն ընդդիմադիր դաշտում են գտնվում, այլև կոալիցիայի ներսում: Ուստի Aravot.am-ը ԲՀԿ ներկայացուցիչ Միքայել Մելքումյանից և ՕԵԿ ներկայացուցիչ Հովհաննես Վահանյանից հետաքրքրվեց՝ ի՞նչն էր իրենց կուսակցություններին խանգարում, որպեսզի ԱԺ-ում այս հինգ տարիների ընթացքում գտնվելով՝ չկարողացան լուծել այն խնդիրները, որոնք առաջադրել էին իրենց նախկին քաղաքական ծրագրերում: Երկու գործիչներն էլ սկսեցին դժգոհել, թե իրենց խանգարել է ԱԺ-ում և կառավարությունում ունեցած ոչ բավարար չափով ներկայացվածությունը:
Երբ Aravot.am-ը խնդրեց կոալիցիոն գործընկերներ-կուսակցությունների ներկայացուցիչներին նշել գիտության ոլորտում գեթ մեկ խնդիր, որը կարողացել են լուծել, նրանք այդպես էլ դա չկարողացան անել և փորձեցին այլ կարծիքներ հայտնելով խուսափել պատասխանից: Մ. Մելքումյանն ասաց, որ իրենց պատգամավորները ակտիվ են աշխատել ԱԺ-ում, Հ. Վահանյանն էլ ՝ թե խնդիրները մեկ օրում չեն լուծվում:
Տաթև ՀԱՐՈՒԹՅՈՒՆՅԱՆ
