Այսօր ՀՀ ոստիկանությունը տարածել է հետեւյալ հայտարարություն-նախազգուշացումը. «ՀՀ ոստիկանությունը լիազորված է հայտարարել, որ մարտի 31-ին, ժամը 13.ՕՕ-ին, Մաշտոցի պուրակում նախատեսվող ապամոնտաժման գործողությունները և մասնակիցների պահանջների հարկադրական կենսագործումը չեն պաշտպանվում հավաքների ազատությամբ: Նշված ապօրինի գործողությունները կարող են որակվել որպես իրավախախտում և աոաջացնել օրենքով սահմանված պատասխանատվություն: Ոստիկանությունը կրկին հիշեցնում է, որ այդ տարածքում շինարարական աշխատանքներ կատարելու վերաբերյալ կայացված վարչական ակտը կարող է վիճարկվել միայն դատական կարգով: Այլ անձանց սահմանադրական իրավունքները սահմանափակող, այդ թվում՝ սեփականության իրավունքի իրացմանը խոչընդոտող և հասարակական կարգի պահպանությանն ու հասարակական անվտանգության ապահովմանը սպառնացող ցանկացած գործողություն դիտվելու է որպես սահմանված կարգի խախտում և օրենքով ամրագրված հիմքերի առկայության դեպքում կհանգեցնի հարկադրանքի կիրառման: Ոստիկանությունը մեկ անգամ ևս հորդորում և պահանջում է զերծ մնալ հակաիրավական գործողություններ կատարելուց, սադրանքներից և իրավիճակի անհարկի սրումից: Ի դեպ, այսօր ոստիկանության ծառայողները Մաշտոցի պուրակի ակտիվիստներին զգուշացրել են իրենց հնարավոր գործողությունների հակաիրավական բնույթի և դրանից բխող հետևանքների մասին»:
Նկատենք, որ այս հայտարարությանը նախորդել էր բնապահպան ակտիվիստների հետեւյալ հայտարարությունը.
«Հետևելով և անմիջական մասնակիցը լինելով Մաշտոցի պուրակում վերջին ամիսների ընթացքում ծավալված իրադարձություններին՝ փաստում ենք, որ.
– Մաշտոցի պուրակի ձևափոխման և բարեկարգման հարցը վերջին ամիսներին հասարակության մեջ մեծ հնչեղություն է ստացել և քաղաքացիների, ինչպես նաև մասնագետների կողմից բազմաթիվ առաջարկություններ են հնչել` այդ հանրային զբոսայգու բարեկարգման և նպատակային օգտագործման վերաբերյալ,
Կարդացեք նաև
– Մյուս կողմից, անցած շաբաթվա ընթացքում Երևանի քաղաքապետարանը սկսել է Մաշտոցի պուրակում բարեկարգման և ոռոգման համակարգի տեղադրման ուղղությամբ մի շարք քայլեր ձեռնարկել:
Այդուհանդերձ, մեր դիտարկումների արդյունքում ստիպված ենք արձանագրել հետևյալը.
– Քաղաքապետարանի բարեկարգման աշխատանքները տարվում են առանց պուրակի ապագա տեսքը կանխորոշող բարեկարգման նախագծի վերաբերյալ հանրային կարծիքը հաշվի առնելու,
– «Կանաչապատում» ՓԲԸ-ն այգու ոռոգման համակարգի և բարեկարգման համար փորձում է տեղադրել հնամաշ և շահագործման համար ոչ պիտանի խողովակներ, որոնք չեն կարող երկար ծառայել հանրությանը,
– «Կանաչապատում» ՓԲԸ-ն նաև չի կարողանում բացատրել բետոնի շրջանակում մնացած ծառերի ոռոգման եղանակը. ըստ էության, բարեկարգման նախագիծը լիարժեք չէ և այն անխուսափելիորեն հանգում է տաղավարների շուտափույթ ապամոնտաժման հրամայական խնդրին,
– Եվ վերջապես «Կանաչապատում» ՓԲԸ-ն մի կողմից թանկարժեք շինանյութ է օգտագործում մասնավոր ընկերությունների համար «իբր» ժամանակավոր կրպակների շինարարության համար, իսկ մյուս կողմից հնամաշ և անպիտան գույք է օգտագործում հանրային զբոսայգին բարեկարգելու համար: Այս փաստերը լուրջ հարցեր են առաջ բերում կանաչապատման համար հատկացվող Երևանի համայնքային միջոցների օգտագործման պրակտիկայի շուրջ:
Ելնելով վերոշարադրյալից` առաջարկում ենք հետևյալը.
– Նախքան Մաշտոցի պուրակում բարեկարգման աշխատանքների իրականացումը հանրային զբոսայգու բարեկարգման ցանկացած նախագիծ այսուհետ ենթակա է հանրային քննարկման` քաղաքացիների և մասնագետների առկա և մշակվող բազմաթիվ առաջարկներն ու գաղափարները հաշվի առնելու նպատակով: Ուստի, առաջարկում ենք հանրությանը ներկայացնել քաղաքապետարանի կողմից այգու բարեկարգման և կանաչապատման համար այս պահին իրագործվող ծրագրի նախագծային փաստաթղթերը, նախահաշվարկները և կատարված աշխատանքների կատարողական ակտերի պատճենները:
– Ցանկանում ենք տեղեկանալ նաև, թե ով է իրականացնում նշված աշխատանքների տեխնիկական վերահսկողությունը, քանի որ աշխատանքների իրականացման որակն ակնհայտորեն բավարար չէ:
– Հանրության առջև հաշվետվականության և թափանցիկության սկզբունքներից ելնելով՝ առաջարկում ենք հանրայնացնել այգու բարեկարգման աշխատանքների իրականացման համար նախատեսվող բյուջեն և ֆինանսական հաշվետվությունները:
– Միմիայն քաղաքացիների մասնակցությամբ հանրային այգու բարեկարգման նախագիծը կստանա հանրային լեգիտիմություն, կվերականգնի այգու հանրային գործառույթը և կապահովի քաղաքային իշխանության ու հասարակության լայն շերտերի համերաշխությունը` հանրային կանաչ տարածքի տեսքի և նպատակային նշանակության շուրջ:
– Առաջարկում ենք վերոհիշյալ հարցերի շուրջ համատեղ քննարկում կազմակերպել մոտակա տասն օրվա ընթացքում:
«Մենք ենք այս քաղաքի տերը» քաղաքացիական նախաձեռնություն
«Մեր քաղաքը» հանրային քաղաքացիական նախաձեռնություն»
