Aravot.am-ը տեղեկացրել է, թե ինչպես են ուժային կառույցները փորձում գրաքննություն սահմանել երիտասարդ բլոգեր, գրող Հովհաննես Իշխանյանի «Ուվալնյատի օրը» գրքի հանդեպ: Հայտնել էինք նաեւ, որ Իշխանյանը ՀՀ մարդու իրավունքների գրասենյակից ստացել է մշակույթի նախարարության գրությունը, որտեղ «Մշակութային արժեքների փորձագիտական կենտրոն» ՊՈԱԿ-ը նշել էր. թե «շարժական մշակութային արժեքների փորձաքննության չափորոշիչները և մշակութային արժեքների փորձաքննության անցկացման ոլորտները չեն նախատեսում տպագիր նյութերի բովանդակային փորձաքննության իրականացում»:
Մեր տեղեկություններով, մասնագիտական եզրակացություն ստանալու համար ՊՆ Ռազմական ոստիկանությունից հեռախոսազանգ է եղել նաեւ ՀՀ ԿԳՆ Լեզվի պետական տեսչություն: Aravot.am-ի հետ զրույցում, սակայն, տեսչության պետ Սերգո Երիցյանը պաշտոնապես հայտնեց, որ ժամը 17-ի դրությամբ իրենց կառույցին գրավոր կամ բանավոր այդ հարցով դեռ չեն դիմել: «Ես անձամբ եմ ստուգում նաեւ մեր էլեկտրոնային փոստին եկած բոլոր նամակները, եթե մի բան լիներ, հաստատ կիմանայի»,-ասաց պարոն Երիցյանը:
Գոհար ՀԱԿՈԲՅԱՆ
