Արտակ Նազարյանի մահվան գործով դատավարության նախորդ նիստերում հենակետի ավագի տեղակալ, ավագ սերժանտ Արտակ Հովհաննիսյանը հայտնել էր, որ «Ղոզլու» հենակետում ծառայողներն օգտագործում էին մականուններ: Վաշտի հրամանատար, ավագ լեյտենանտ Գագիկ Ուդումյանի մականունը եղել է «երեքաստղանի հրեշ»:
Դատավարության մարտի 27-ի նիստում, մեղադրող Հարություն Հարությունյանը եւ դատավոր Սամվել Մարդանյանը վկա, գումարտակի հրամանատար Միքայել Գաբրիելյանից փորձում էին ճշտել, թե հենակետում մականուններ օգտագործե՞լ են: Վկան ժպիտը դեմքին անտեղյակ ձեւացավ: Երբ դատավոր Մարդանյանը հարցրեց Գագիկ Ուդումյանի մականվան մասին, փոխգնդապետ Մ. Գաբրիելյանը զավեշտալի պատասխան տվեց.
– Եթե նա երեքաստղանի հրեշ է, ուրեմն ես երկու աստղանի չգիտեմ ինչ եմ:
Կարդացեք նաև
Դահլիճում գտնվողները ծիծաղեցին:
Գումարտակի հրամանատարն Ուդումյանի մասին ասաց, որ իր ղեկավարած գումարտակի 3 վաշտերի հրամանատարներից ամենախստապահանջը Գագիկ Ուդումյանն էր, ով Գաբրիելյանի խոսքերով` լավ սպա է:
Ոսկան ՍԱՐԳՍՅԱՆ
