Ոսկեպար գյուղը
1991թ. մայիսի 6-ին խորհրդային զինուժի հարձակման հետեւանքով Ոսկեպարի անտառում զոհվեցին նոյեմբերյանցի 14 ոստիկաններ, ովքեր մեկնում էին սահմանը պաշտպանելու: Ոստիկանների զոհվելուց հետո` 1992թ., բոլորի ընտանիքներին՝ որպես աջակցություն, տրվել են գումարներ:
Զոհված կապիտան Ռաֆիկ Մնացականյանի մայրը` Արճիս գյուղի բնակիչ Ռոզա Մնացականյանը, մեզ է տրամադրել Ռաֆիկի երկու զավակների` Արթուրի եւ Լենայի անուններով «Ֆինիստ» բանկի 2 խնայողական գրքույկներ, յուրաքանչյուրում` 25 հազար խորհրդային ռուբլի: Նոյեմբերյանցի զոհված ոստիկան Մարտիկ Գիշյանի մորը` Գյուլասար Գիշյանին եւ նրա ամուսնուն նույն բանկի 2 գրքույկ է տրվել` յուրաքանչյուրում` 25 հազար ռուբլի: Ամուսնու մահից հետո վերջինիս խնայողական գրքույկի գումարը վերաձեւակերպվել է տիկին Գյուլասարի անունով:
Զոհված ոստիկանների հարազատներն անցած 20 տարում գումարների փոխհատուցման համար դիմել եմ տարբեր ատյաններ, սակայն ապարդյուն: Գյուլասար Գիշյանն այս կապակցությամբ 2011թ. մայիսի 25-ին դիմել է Ազգային ժողովի նախագահին: Դիմումի պատասխանը ստացվել է ֆինանսների նախարարության աշխատակազմի ղեկավար Ա. Շահնազարյանից: Վերջինս հղում անելով «Բանկերի եւ բանկային գործունեության մասին» ՀՀ օրենքին, հայտնել է, թե արգելվում է որեւէ կերպ միջամտել բանկի գործունեությանը:
2011թ. հունիսի 6-ին տիկին Գյուլասարը դիմել է ՀՀ վարչապետին, դիմումը վերահասցեագրվել է ՀՀ կենտրոնական բանկ: Բանկի իրավաբանական վարչության պետ Վարուժան Ավետիքյանը 2011թ. հունիսի 14-ին Գյուլասար Գիշյանին տեղեկացրել է, որ Մոսկվայի «Ֆինիստ բանկ» բաժնետիրական կոմերցիոն բանկի հայկական մասնաճյուղը 1994թ. լուծարվել է եւ ՀՀ կենտրոնական բանկն այդ հարցում չի կարող իրենց աջակցել:
Կարդացեք նաև
Բայց չէ որ «Ֆինիստ» բանկի հայկական մասնաճյուղի լուծարման ժամանակ պետք է հաշվի առնվեին ավանդատուների ավանդները եւ դրանց փոխհատուցման ձեւեր գտնվեին: Պատկան ատյանները չպետք է անուշադրության մատնեն սահմանագոտում, հայրենիքը պաշտպանելիս զոհված ոստիկանների ընտանիքների խնդիրը:
Ոսկան ՍԱՐԳՍՅԱՆ
