«Ապրիլի 7-ին Ազատության հրապարակում «Օրինաց երկիր» կուսակցությունը կկազմակերպի հանրահավաք, իսկ ապրիլի 8-ին տեղի կունենա կուսակցության նախընտրական ծրագրի շնորհանդեսը»,- այսօր «Իրատես դե ֆակտո» մամուլի ակումբում հրավիրված ասուլիսի ժամանակ հայտարարեց ՕԵԿ փոխնախագահ, ՕԵԿ խմբակցության ղեկավար Հեղինե Բիշարյանը:
Տիկին Բիշարյանը ևս մեկ անգամ նշեց, որ իրենք նպատակ են դրել խորհրդարանում կրկնապատկել իրենց ներկայացվածությունը: ՕԵԿ փոխնախագահը հատկապես վրդովված էր այն երևույթից, որ տարբեր քաղաքական ուժեր ներկայումս զբաղված են ՕԵԿ-ի վրա ցեխ շպրտելու քաղաքականությամբ և սև PR-ով:
Լրագրողներին հետաքրքրեց՝ տիկին Բիշարյանի կարծիքով, կուսակցության մասին ոչ պատվաբեր լուրերի տարածումը հրահրված է ընդդիմությա՞ն, թե՞ նաև կոալիցիոն գործընկերների կողմից: Հ. Բիշարյանը պատասխանեց. «Ես այդքան միամիտ չեմ: Չեմ բացառում, որ դրանք հրահրված են նաև կոալիցիոն գործընկերների կողմից»:
Հ. Բիշարյանը պարզաբանումներ տվեց այդպիսի մի քանի լուրերի առիթով: Անդրադառնալով այն խոսակցություններին, թե Էդուարդ Մադաթյանը («Խուճուճ Էդո») դուրս է եկել ՕԵԿ-ից՝ նա ասաց. «Ամեն մարդ թող իր համար քնի եւ երազ տեսնի: Ո՞վ է երազում տեսել, որ Էդուարդ Մադաթյանը դուրս է եկել ՕԵԿ–ից»:
Կարդացեք նաև
ՕԵԿ-ի նախկին մամուլի քարտուղար Սուսաննա Աբրահամյանի լիազորությունները վայր դնելու եւ նրա իսկ պնդումների մասին, որ նա հնարավոր է՝ լքի նաեւ կուսակցությունը, ՕԵԿ փոխնախագահն ասաց. «Սուսաննա Աբրահամյանը չի լքել կուսակցությունը եւ չի լքելու: Նա ընդամենը մամուլի քարտուղարի իր աշխատանքի մասին է խոսել եւ դա քաղաքականացնելը ճիշտ չէ»:
ՕԵԿ-ի կողմից ընտրողներին մուրաբաներ ու ջեմեր բաժանելու առիթով էլ տիկին Բիշարյանը բարի ախորժակ մաղթեց բոլոր ստացողներին և պարզաբանեց, որ դա իրենք բաժանել են իրենց կուսակցության անդամներին տոների առթիվ: Այն դիտարկմանը, թե մի ամբողջ շենքի մուտքի բնակիչների բաժանել են, տիկին Բիշարյանը պատասխանեց. «Ուրեմն նրանք բոլորն էլ ՕԵԿ–ից են եղել»:
Տաթև ՀԱՐՈՒԹՅՈՒՆՅԱՆ
