Ստեղծագործական կազմը՝ աշխատանքի պահին:
Ռեժիսոր Ջիվան Ավետիսյանը Մարիաննա Փայտյանի սցենարով նոր ֆիլմ է նկարել «Ղարաբաղ՝ թաքնված գանձ» վերնագրով, որը, ըստ հեղինակների, պատմում է ոչ թե Ղարաբաղյան հիմնահարցի մասին, այլ ներկայացնում է այսօրվա Արցախը: Ֆիլմը միտված է խթանելու զբոսաշրջությունը: Նկարում օգտագործվել են ոչ թե հանրագիտարանային նյութերը, այլ փորձառու մասնագետների դիտարկումները:
Ինչու ստեղծագործական կազմը որոշեց նման ֆիլմ նկարել: «Արցախի կառավարությանն առընթեր զբոսաշրջության վարչությունը մրցույթ էր հայտարարել, «Երկիր մեդիա» հեռուստաընկերությունը եւս մասնակցում էր դրան: Փաթեթ էինք ներկայացրել եւ սցենարական պլանով հաղթող ճանաչվեցինք մենք»,- ասում է ռեժիսորը:
Ֆիլմն իր բովանդակությամբ ինչո՞վ է տարբերվում Արցախի մասին պատմող այլ ֆիլմերից: «Ղարաբաղի մասին ինքս էլ ունեմ մի շարք ֆիլմեր, սա արդեն 8-րդն է: Մյուս բոլորը նկարահանվել են հատուկ փառատոների համար, ցուցադրվել մեծ էկրանին, հեռուստատեսությամբ: Վերջին ֆիլմս յուրահատուկ է նրանով, որ Լեռնային Ղարաբաղը դիտարկում ենք այլ տեսանկյունից: Տուրիզմի զարգացում է հետապնդում ֆիլմը, դրա համար կարեւոր էր, որ այն լիներ համապատասխան կինեմատոգրաֆիական որակով, բովանդակությամբ ու արժեքավոր, որպեսզի Արցախը համաշխարհային զբոսաշրջության կենտրոններին հավուր պատշաճի ներկայանար»,- հավելում է մեր զրուցակիցը:
Սցենարիստ Մարիաննա Փայտյանի խոսքով. «Մեր սցենարի միջոցով 35 րոպեում դուք ոչ միայն կպտտվեք Արցախում, կփնտրեք թաքնված գանձ Ղարաբաղը, այլեւ դրանից հետո էլ ցանկություն կունենաք իրականում այցելել: Մենք 35 րոպեում ամփոփել ենք այն, ինչը, ըստ էության, բոլորին «կդրդի» տեսնել Արցախը»:
Կարդացեք նաև
Իսկ ի՞նչ պատմական վայրեր կամ հուշարձաններ են ներկայացված «Ղարաբաղ՝ թաքնված գանձ»-ում: Սցենարիստն ասում է, որ ֆիլմում նկարահանված է այն ամենը, ինչը զբոսաշրջիկին կգայթակղի՝ գալ-տեսնել Արցախը եւ չպատմել կոնֆլիկտի մասին. «Համարյա բոլոր ներկայանալի ու հետաքրքրություն առաջացնող վայրերը նկարված են: Շեշտադրություն է արվել, օրինակ, պատմական Արցախի վանական համալիրներից մեկի՝ 1-ին դարում հիմնադրված Դադիվանքի եւ ընդհանրապես յուրօրինակ ամեն ինչի վրա»:
ԳԱՐԻԿ ԱՎԵՏԻՍՅԱՆ
«Առավոտ» օրաթերթ
