Տիգրան Տեր-Պետրոսյան-Մհեր Սեդրակյան
Aravot.am-ի տեղեկություններով, առաջիկա խորհրդարանական ընտրություններին մեծամասնական ընտրակարգով առաջադրումների ժամանակահատվածում դեմ առ դեմ հանդիպել են Էրեբունու նախկին թաղապետ, ՀՀԿ-ական Մհեր Սեդրակյանն ու Հայ ազգային կոնգրեսի համակիր, ՀՀ առաջին նախագահ Լեւոն Տեր-Պետրոսյանի եղբոր որդին՝ Տիգրան Տեր-Պետրոսյանը: Հանդիպման ժամանակ, ըստ մեր տեղեկությունների, քննարկման առարկան եղել է այն, որ Տիգրան Տեր-Պետրոսյանն իր թեկնածությունը Մհեր Սեդրակյանի դեմ թիվ 13 ընտրատարածքում չի առաջադրի, իսկ Մհեր Սեդրակյանն էլ թիվ 12 ընտրատարածքում Տեր-Պետրոսյանին չի խանգարի:
Էրեբունու նախկին թաղապետը մեզ հետ զրույցում հաստատեց, որ նման հանդիպում եղել է, բայց հերքեց քննարկման առարկայի վերաբերյալ մեր տեղեկությունները: Նախ՝ նա ասաց, թե Տիգրան Տեր-Պետրոսյանին լավ է ճանաչում, որովհետեւ նա իր թաղապետ եղած ժամանակ «իմ ավագանին էր»: Երկրորդ, հանդիպումն իր՝ Սեդրակյանի նախաձեռնությամբ է տեղի ունեցել եւ այլ հարցի առնչությամբ: Երրորդ՝ «նա ո՞նց կարող էր նման բան առաջարկել կամ իմ դեմ առաջադրվել: Ես Էրեբունիում 40 հազար ձայն ունեմ»:
Էրեբունու թաղապետի ասելով, ընտրությունների հարցն այդ հանդիպման ժամանակ, այնուամենայնիվ, քննարկվել է, «ու ես ասել եմ՝ եկեք էս անգամ նորմալ ընտրություններ անցկացնենք, թե չէ Էրեբունու մասին միշտ վատ բաներ են գրվել: Տարիքով, մեծ մարդ ենք, էլի, գոնե մի անգամ նորմալ ընտրություններ անցկացնենք, որ հետո ավելորդ խոսակցություններ չլինեն: Պայմանավորվել ենք, որ նորմալ ենք աշխատելու, մաքուր ընտրություններ ենք անելու, ով ինչքան հավաքի՝ հավաքի, իրարից ձեն փախցնել չի լինելու, որովհետեւ եթե իրարից ձեն փախցրեցինք՝ էդ բերելու ա ուժ կիրառելուն: Ես էդ չեմ ուզում, էս մեր համայնքն ա, ես էս համայնքը շատ եմ սիրում»:
Սեդրակյանն ասաց նաեւ, թե մտադիր է մի հանդիպում էլ կազմակերպել իրար հետ մրցակցող կուսակցությունների ներկայացուցիչների մասնակցությամբ, «որ նստենք էս հարցերի շուրջ մարդավարի պայմանավորվենք»:
Կարդացեք նաև
Վերջում նախկին թաղապետին հարցրինք՝ եթե իրեն մնար, կուզեր որ թիվ 12 ընտրատարածքում առաջադրված թեկնածուներից ո՞վ հաղթեր: Հիշեցնենք, որ այս ընտրատարածքում առաջադրվել է 6 թեկնածու, այդ թվում՝ «Ժառանգությունից» Անահիտ Բախշյանը, ԲՀԿ-ից՝ ԱԺ պատգամավոր Լյովա Խաչատրյանը, Գոհար Վեզիրյանն ու ՀԱԿ-ից՝ Տիգրան Տեր-Պետրոսյանը: «Եթե իմ ուզելով լիներ՝ կուզենայի, որ ներսի մարդ ընտրվեր՝ էրեբունցի, որովհետեւ էդ մի քիչ էլ թասիբի հարց ա: Եթե իմ ուզելով լիներ՝ կուզեի, որ կա՛մ Տիգրանն անցներ, կա՛մ Գոհարը»:
Հիշեցնենք, որ ինքը՝ Էրեբունու նախկին թաղապետ Մհեր Սեդրակյանն առաջադրվել է թիվ 13 ընտրատարածքում, որտեղ նրա մրցակիցն է ՀԱԿ-ի կողմից պաշտպանվող թեկնածու Վիոլետտա (Մանուշակ) Պետրոսյանը, նաեւ ՀՀԿ-ական Սարգիս Հակոբյանը:
