«Չնայած քարոզարշավը դեռ չի սկսվել, նախընտրական քարոզարշավի այդ աղբը արդեն լցվել է մեր տները` ակնոցների շրջանակից, ատամի պլոմբներից եւ ջեմերով, շոկոլադներով: Բանը հասել է նրան, որ հենց Մեծամորում հարեւանս պատմում է, որ մի շտաբում իշխանական կուսակցություններից մեկը բամբաներկա է նվիրում, մյուսը` ջեմ, երկուսից էլ օգտվում են, ասում են ինչ լավ է` երեխայիս ծնունդը մանկապարտեզում կանեմ: Սա ողբերգություն է, որովհետեւ արդյունքում մենք այլասերում ենք հասարակությունը»,- այսօր այդ մասին ահազանգեց ՀՅԴ պատգամավոր Լիլիթ Գալստյանը` համամասնական ցուցակների թեմայով Քաղաքական եւ միջազգային հետազոտությունների կենտրոնի եւ USAID-ի կազմակերպած քննարկմանը, որին հրավիրված էին նաեւ ՀՀԿ, ԲՀԿ եւ ՀԱԿ ներկայացուցիչները:
Aravot.am-ի հետ զրույցում հարցին` ճիշտ է, այդ մասին բոլորը խոսում են, բայց կոնկրետ փաստեր ունե՞ք, որ կաշառք է բաժանվում, Լիլիթ Գալստյանն իր անձնական օրինակը բերեց. «Վերջերս մտա Բաղրամյան փողոցում գտնվող մի վարսավիրանոց, վարսավիրն էր, թե մենեջերն ասաց, որ ձեր այս գեղեցկության, հարդարման ծախսերը կհոգա Արտակ Սարգսյանը: Ես չեմ լսել այդ մասին, վկան եմ դրա: Բաղրամյան փողոցի վրա գտնվող բոլոր վարսավիրանոցներում է Արտակ Սարգսյանը այդ ծառայությունները մատուցում: Նա հանկարծ որոշել է, որ հայ կանանց պիտի գեղեցկացնի»:
Նշենք, որ «ՍԱՍ» սուպերմարկետների ցանցի սեփականատեր Արտակ Սարգսյանը մեծամասնական ընտրակարգով առաջադրվել է Արաբկիրի թիվ 4 ընտրատարածքում: Մամուլում շրջանառվում է նաեւ, որ նա բուլղարական օծանելիք եւ «Սորինի» կոնֆետներ է բաժանել: ՀՀԿ-ական Արտակ Սարգսյանից փորձեցինք այս առնչությամբ պարզաբանում ստանալ, բայց հեռախոսազանգն անընդհատ անջատում էր` առանց պատասխանելու:
Մենք Լիլիթ Գալստյանից հետաքրքրվեցինք` այսօր իրավապահ մարմիններն օրենքը պատրա՞ստ են կիրառել ընտրակաշառք բաժանողների եւ վերցնողների նկատմամբ` նա պատասխանեց. «Իրավապահ մարմիննները վաղուց արդեն իշխանության այդ վարչական ռեսուրսի մեջ են, այն ռեսուրսն է, որը նպաստում է իշխանության վերարտադրմանը»:
Կարդացեք նաև
Հռիփսիմե ՋԵԲԵՋՅԱՆ
