Շենգավիթ համայնքի թիվ 12 ընտրատարածքում առաջադրված «Ժառանգության» պատգամավոր Անահիտ Բախշյանը երեկ Panorama.am-ին ահազանգել էր, որ Մանանդյան փողոցում ոմն Արսեն, որի մականունն է Այվազ , հանդես գալով ՀՀԿ-ի անունից, 8 հազար դրամ է բաժանում քաղաքացիներին ` կուսակցությանը ձայն տալու համար: Նույն փողոցի ԲՀԿ գրասենյակում էլ Վոլոդյա անունով մեկը ԲՀԿ-ի օգտին քվեարկելու համար 13 հազար դրամ է բաժանում:
Անահիտ Բախշյանի ձեռքն է ընկել նաեւ ՀՀԿ-ի մշակած այն հատուկ ցուցակի ձեւը, որտեղ ապագա ընտրողից պահանջվում է լրացնել անձնագրի տվյալներ, հեռախոսահամար եւ այլն: Այդ թերթիկը, ըստ տիկին Բախշյանի, բաժանել են Շենգավիթի հանրակրթական դպրոցների ուսուցիչներին:
Կարդացեք նաև
«Թող հրապարակումը հիմք լինի, ես հրապարակման մեջ դիմել եմ ոստիկանությանը, ԿԸՀ–ին, առայժմ ոչինչ չեմ կարող անել»,– այս կապակցությամբ Aravot.am-ին ասաց Անահիտ Բախշյանը:
Նշենք, որ ըստ Քրեական օրենսգրքի, ընտրակաշառք ստանալը եւ կաշառք տալը, քրեորեն պատժելի արարք է: Քրօրի 154 հոդվածի համաձայն` կաշառք uտանալը պատժվում է տուգանքով՝ նվազագույնը 16 միլիոն դրամով, կամ ազատազրկումով`1-3 տարի ժամկետով, իսկ կաշառք տալու համար է’լ ավելի կոշտ պատիժ է նախատեսվում: Այս առնչությամբ Անահիտ Բախշյանը վստահեցրեց, որ իրավապահ մարմիններն այլընտրանք չեն ունենալու եւ անպայման օրենքի ողջ խստությամբ պատժելու են ընտրակաշառք բաժանողին, բայց մինչ այդ պիտի հաջողվի բռնել նրա ձեռքը. «Եթե ինձ հաջողվի, Աստված տա մեկին բռնեմ` փաստը ձեռքին, ուրեմն այդ մարդն օրենքով սահմանված ամբողջ պատիժը կրելու է, ես դա խոստանում եմ հասարակությանը: Ինձ դժվար կլինի կաշառքը ձեռքին բռնել, որովհետեւ ինձ ճանաչում են, բայց ես լուրջ ցանց ունեմ այդ տարածքում, շատ հավատավոր մարդիկ ունեմ, ինչպես ինձ տեղնուտեղը զանգեցին, ֆիզիկապես հնարավոր չէր հասցնել ու տեղում բռնել, բայց դեռ առիթ կլինի: Ու եթե բռնեմ` ով ուզում է լինի` ինքը կկրի պատիժն օրենքով սահմանված կերպով»:
Մեր դիտարկմանը, որ ընտրակաշառք վերցնողը եւ տվողը բնականաբար չեն գնա ու դիմեն իրավապահ մարմիններին, որպեսզի խոսուն ապացույց համարվի` տիկին Բախշյանը հավաստիացրեց, որ «քաղաքացիներ ունենք, ովքեր պայքարում են կաշառքների դեմ, մարդիկ պատրաստ են իրենք հայտնաբերել ու փաստը ինձ տալ: Լինելու են մարդիկ, ովքեր հետեւելու են եւ բռնացնելու են, նկարելու ենք ու ձայնագրելու` որպես ապացույց: Մինչեւ վերջ գնալու եմ»:
Հռիփսիմե ՋԵԲԵՋՅԱՆ
