ՀՀ ոստիկանությունը երեկ հրապարակեց մայիսի 6-ին կայանալիք ԱԺ ընտրությունների ընտրական ցուցակները, որոնցում ընդգրկված է 2 միլիոն 485 հազար 844 ընտրող։ Այս թիվը Հայաստանի պատմության մեջ ընտրողների ամենաբարձր ցուցանիշն է։ Ստացվում է նաեւ, որ վերջին համապետական՝ 2008-ի նախագահական ընտրությունների համեմատ ընտրողների թիվը մեր երկրում աճել Է 165 հազար 469-ով։ Ընտրողների այս թիվը ընդհուպ մոտեցել է եւ շուտով կարող է հավասարվել Հայաստանում առկա բնակչության թվին։ Պաշտոնական վիճակագրության համաձայն, 2011-ի հոկտեմբերի դրությամբ Հայաստանում ապրում է 2 միլիոն 871 հազար 509 մարդ։ Եթե հավատանք ընտրացուցակներին, կստացվի, որ մեր երկրում առավելագույնը 385 հազար 665 երեխա կա, կամ ավելի ճիշտ՝ 18 տարին չլրացած անձ։ Հիշեցնենք, որ ընտրացուցակներում չեն ընդգրկվում նաեւ քաղաքացիություն չունեցող անձինք՝ փախստականները։ Ըստ ցուցակների, սակայն, ընտրողների թվի աճ է արձանագրվել հանրապետության գրեթե բոլոր ընտրատարածքներում։ Ամենաշատ ընտրող ունեցող ընտրատարածքը թիվ 19-ն է՝ 74 հազար ընտրող։ Այս ընտրատարածքն ընդգրկում է Արմավիրի մարզը եւ 2008-ին ունեցել է մոտ 60 հազար ընտրող։ Ընտրողների թվի ամենամեծ աճը Արմավիրի թիվ 20 ընտրատարածքում է, որը 2008-ին ունեցել է 54 հազարից մի փոքր ավելի, իսկ այժմ՝ մոտ 73 հազար ընտրող։ Երեւանի ընտրողների թիվը, 2008-ի համեմատ, ավելացել է մոտ 53 հազարով եւ կազմում է 808 հազար։ Երեւանի 13 ընտրատարածքներից ընտրողների թիվը ամենաշատն ավելացել է թիվ 12-ում՝ մոտ 59 հազարից դարձել է 68 հազար։ Մայրաքաղաքի թիվ 7, 9 եւ 11 ընտրատարածքներում ընտրողների թիվը ավելացել է շուրջ 5 հազարով, մնացած տեղերում թվերն աճել են 3-4 հազարով։ Ինչպես երեւում է ստորեւ բերվող աղյուսակից, վերջին առնվազն ութ ընտրություններում ՀՀ ընտրողների թիվը օր օրի ավելանում է, չնայած, պաշտոնական վիճակագրությամբ, բնակչության թիվը տարեցտարի պակասում է։
«Հայկական ժամանակ»
