Այսօր Aravot.am-ը ՀՅԴ համամասնական ցուցակի 71-րդ տեղը զբաղեցնող, գյումրեցի պատմաբան Արշավիր Գասպարյանին հարցրեց, թե ինչպե՞ս է վերաբերում հաճախակի հնչող այն քննադատություններին, թե կուսակցությունները խորհրդարան են ուղարկում հին, դարն ապրած ու լճացած կերպարների: «Խորհրդարանում իրոք պետք է նորացում լինի, կան մարդիկ, որոնք երկար տարիներ մնացել են նույն տեղում, լճացել են և կան մարդիկ, որոնք երբևեցէ ոչ մի անգամ ելույթ չեն ունեցել, առավել ևս մեծամասնական համակարգով 41 ընտրված պատգամավորներից 29-ը հինգ տարի շարունակ ոչ մի անգամ ելույթ չեն ունեցել:Ստացվում է, որ պատգամավորը իր տեղում չի գտնվում: Հիմա անհրաժեշտ էր նրանց փոխարինել այնպիսի մարդկանցով, որոնք իրոք կհասկանային ինչի համար են խորհրդարան գնում, կհասկանային, որ գնում են չարչարվելու, աշխատելու և ոչ թե ինչ-որ տանիք ձեռք բերելու կամ այլ, այլ հարցեր լուծելու համար: Տեսեք քաղաքակիրթ, նորմալ երկրներում ոչ բոլորն են ձգտում պատգամավոր դառնալ, քաջ գիտակցելով դրա ծանրությունը, պատասխանատվությունը, իսկ մեզ մոտ…. Կուսակցությունները պետք է վերանայեն իրենց ցուցակները, թարմացնեն դեմքերը, նոր մարդկանց ներգրավեն, նոր մոտեցումներ պետք է լինեն, ճանապարհ պետք է հարթեն նոր դեմքերի համար: Իհարկե, կան կուսակցություններ, որոնց մոտ նոր դեմքեր ենք տեսնում, բայց այդ նոր դեմքերի այսպես ասած անցնելու հավանականությունը շատ քիչ է, ցուցակների վերջերում են, իսկ հներից մարդիկ հոգնել են»,-ասում է մեր զրուցակիցը:
Նա առանձնապես լուրջ ակնկալիքներ չի փայփայում ապագա խորհրդարանից, թեև հույս ունի, որ գոնե մեկ աստիճանով բարձր լինի նախորդից: Ի դեպ, պատմաբանին ի սրտե նյարդայնացնում է նաև մեր երկրի կուսակցությունների թիվը: «Հայաստանը աբսուրդային վիճակում է, մոտ 70 կուսակցություններ կան , ես կարծում եմ, որ մեր երկրին լի ու լի բավական է 3-4 կուսակցությունը և բոլոր այդ մանր, ես կասեի գաճաճ կուսակցությունները պետք է միավորվեն այդ կուսակցությունների գաղափարների ու ծրագրերի շուրջ»,- ասում է Արշավիր Գասպարյանը:
Նունե ԱՐԵՎՇԱՏՅԱՆ
