Արժույթի միջազգային հիմնադրամի (ԱՄՀ) առաքելությունը, պրն. Մարկ Հորթոնի գլխավորությամբ, մարտի 14 –27-ն այցելել է Երևան` «Երկարաձգվող ֆինանսավորման » (EFF)/ «Երկարաձգվող վարկավորման» (ECF) ծրագրերի չորրորդ ամփոփիչ ստուգման շուրջ քննարկումներ ծավալելու նպատակով: Այցի վերջում պրն. Հորթոնն արել է հետևյալ հայտարարությունը.
«Չնայած պակաս սատարող արտաքին միջավայրին` ընդհանուր մակրոտնտեսական պայմանները շարունակել են բարելավվել: Ենթադրվում է, որ 2011 թվականին տնտեսությունն աճել է 4,4 տոկոսով` պայմանավորված արդյունաբերության և ծառայությունների ոլորտների ուժեղ աճով: Գնաճը զգալի չափավորվել է` փետրվարին կազմելով 4 տոկոսից ցածր (նախորդ տարվա նույն ժամանակահատվածի նկատմամբ), ինչին օժանդակել է կայուն դրամավարկային միջավայրը: Հարկաբյուջետային ճշգրտումը շարունակելու, ինչպես նաև արտահանման և դրամական փոխանցումների զգալի աճի շնորհիվ, զսպվել են արտաքին անհավասարակշռությունները, սակայն արտաքին ընթացիկ հաշվի պակասուրդը համեմատաբար մեծ է պահպանվում, իսկ խոցելիությունների կրճատման համար պահանջվում է լրացուցիչ ճշգրտում:
2011 թվականի երկրորդ կիսամյակում քաղաքականության իրականացումը եղել է ծրագրին համահունչ, ընդ որում` 2011 թվականի վերջի դրությամբ ապահովվել են բոլոր քանակական կատարողական չափանիշները: Հարկաբյուջետային իրավիճակը զգալի ամրապնդվել է. ընդհանուր պակասուրդը 2011 թվականին զգալի նվազել է 2010 թվականին արձանագրված շուրջ 5 տոկոսից: Իշխանությունները գովելի շրջահայացություն են դրսևորել նոր պարտքի ծավալների և պայմանների հարցում, այդ թվում ուշադրությունը կենտրոնացնելով անառողջ վիճակում գտնվող քիմիական «Նաիրիտ» գործարանի հարցի` մասնավոր հատվածի կողմից հնարավոր լուծման տարբերակի վրա: Կառավարության քայլերն ընթանում են 2012 թվականին հարկերի հավաքագրման զգալի աճի ապահովման ուղղությամբ, որը կօգնի ստեղծել հարկաբյուջետային անհրաժեշտ հնարավորություններ` արձագանքելու մասնավոր հատվածի հաշվին ապահովվող աճի աջակցման և աղքատության կրճատման հրատապ խնդիրներին:
Կառավարությունը և Հայաստանի կենտրոնական բանկն ապահովել են կամ զգալի առաջընթաց են արձանագրել ծրագրի շրջանակում բոլոր կառուցվածքային հենանիշների ուղղությամբ: Հարկային վարչարարության ուղղությամբ իրականացվել են կարևոր տեխնիկական քայլեր` ըստ ամենայնի հող նախապատրաստելով ավելի արդիական, արդյունավետ և գործարարության համար նպաստավոր հարկային վարչարարության համար: Առաջընթաց է ապահովվել նաև հաջորդ մի քանի տարիների համար հարկային քաղաքականության ռազմավարությունների սահմանման, գնաճի նպատակադրման ծրագրի հետագա ամրապնդման, ֆինանսական կայունության համախմբման և սոցիալական ծառայությունների մատուցման արդյունավետությունը խթանելու ուղղությամբ:
Կարդացեք նաև
Թույլ արտաքին միջավայրի ֆոնի վրա, աճի կանխատեսումը 2012 թվականին իջեցվել է մինչև 3.8 տոկոս, ընդ որում ռիսկերը շեղված են դեպի նվազում: Միջազգային գների նկատմամբ հետագա ճնշումների բացակայության սպասումների լույսի ներքո ակնկալվում է, որ գնաճը կպահպանվի կենտրոնական բանկի նպատակադրած ցուցանիշի շուրջը: Միջնաժամկետում հարկաբյուջետային կոնսոլիդացումը շարունակելու, իշխանությունների կողմից արտահանման աճի և գործարար միջավայրի այլ բարելավումների վրա ողջունելի կենտրոնացման, զգալի դրամական փոխանցումների և փոխարժեքի ճկունության պայմաններում ակնկալվում է, որ ընթացիկ հաշվի պակասուրդը կշարունակի նվազել:
Առաքելությունն իշխանությունների հետ համաձայնություններ է ձեռք բերել 2012 թվականի քաղաքականության կառուցվածքի վերաբերյալ, որը կարող է հիմք հանդիսանալ եռամյա «Երկարաձգվող վարկավորման»/«Երկարաձգվող ֆինանսավորման» ծրագրի շրջանակում չորրորդ ամփոփիչ ստուգումն ավարտելու համար: Ըստ նախնական ժամանակացույցի նախատեսվում է, որ ԱՄՀ Գործադիր խորհուրդը 2012 թվականի մայիսին քննության կառնի ստուգումն ավարտելու հարցը: Հաստատման դեպքում ԱՄՀ-ն կտրամադրի վարկի` 56 միլիոն ԱՄՆ դոլար գումարով չորրորդ չափաբաժինը` ծրագրի շրջանակում տրամադրված գումարը հասցնելով 181 միլիոն ՓՀԻ (շուրջ 279 միլիոն ԱՄՆ դոլար):
Պատվիրակությունը հանդիպել է վարչապետ Տիգրան Սարգսյանի, ֆինանսների նախարար Վաչե Գաբրիելյանի, կենտրոնական բանկի նախագահ Արթուր Ջավադյանի, էկոնոմիկայի նախարար Տիգրան Դավթյանի, էներգետիկայի և բնական պաշարների նախարար Արմեն Մովսիսյանի, ինչպես նաև պետական այլ բարձրաստիճան պաշտոնյաների, միջազգային համայնքի, բանկային և գործարար ոլորտների և քաղաքացիական հասարակության ներկայացուցիչների հետ: Առաքելությունը ցանկանում է շնորհակալություն հայտնել իշխանություններին և Հայաստանի մյուս գործընկերներին գերազանց համագործակցության համար»:
Արժույթի միջազգային հիմնադրամ
