ԱՄՆ-ի Կոնգրեսի շենքը
Ամերիկացի կոնգրեսականները կրկին դիմում են Սպիտակ տանը` Ջավախքին հատկացվող ֆինանսական օգնության ծավալները մեծացնելու կոչով: Այս մասին երկուշաբթի օրը Վաշինգտոնում կայացած լսումների ժամանակ հայտարարեց Կալիֆորնիայից ընտրված դեմոկրատ կոնգրեսական Բրեդ Շերմանը:
Կապիտոլիումում կազմակերպված լսումները նվիրված էին 2013 թվականի բյուջեի նախագծով Միջազգային զարգացման ամերիկյան գործակալությանը` USAID-ին հատկացվող չափաբաժնի քննարկմանը:
«Ինչ վերաբերում է Վրաստանի Հանրապետության կազմում գտնվող Ջավախքի տարածաշրջանին, ապա ես տեսնում եմ, որ ըստ բյուջեի նախագծի Վրաստանին նախատեսվում է հատկացնել մոտ 68 միլիոն դոլարի օգնություն», – հայտարարեց Շերմանը` հավելելով. – «Մենք այս խնդիրն արդեն իսկ քննարկել ենք Վաշինգտոնում Վրաստանի դեսպանի հետ, փորձելով պարզել` արդյոք անհրաժե՞շտ է, որպեսզի Միացյալ Նահանգները հատուկ ուշադրություն դարձնի Վրաստանի հարավում գտնվող այս տարածաշրջանին, եւ արդյոք նման ուշադրությունը առանձին վերցված մեկ տարածաշրջանին վիրավորական չի՞ լինի Թբիլիսիի համար: Ուրախությամբ արձանագրում եմ, որ Վրաստանի դեսպանությունը հստակ հայտարարեց, որ աջակցում է Սամցխե-Ջավախեթի տարածաշրջանում բնակվող Վրաստանի քաղաքացիների համար տնտեսական զարգացման պայմանների ստեղծմանն ուղղված` ամերիկյան կառավարության ջանքերին»։
Շերմանը կոչ արեց USAID-ի ղեկավարությանը` հաջորդող ֆինանսական տարում լուրջ ուշադրություն դարձնել հատկապես Ջավախքում աշխատատեղերի ստեղծմանը:
Կարդացեք նաև
USAID-ի ղեկավար Ռաջիվ Շահը, արձագանքելով դեմոկրատ կոնգրեսականի կոչին, նշեց, որ իր ղեկավարած կառույցն արդեն իսկ լուրջ ջանքեր է գործադրում այս ուղղությամբ:
«Վրաստանի` մասնավորաբար ձեր հիշատակած Սամցխե-Ջավախեթի տարածաշրջանի մասին կարող եմ ասել, որ մենք այստեղ առանձնահատուկ ծրագրեր ենք իրագործում` ուղղված, մասնավորապես, գյուղատնտեսության
ոլորտի արդիականացմանը, սոցիալական ու առողջապահական ոլորտների զարգացմանը, աջակցում ենք տեղի քաղաքացիական հասարակությանը:Մենք այս ուղղությամբ ենք աշխատում` միաժամանակ խորհրդակցելով ամերիկահայ կառույցների հետ», – ասաց USAID-ի տնօրենը:
Վերջին մեկ տարվա ընթացքում ամերիկահայ կառույցներն իրոք ակտիվորեն սկսել են զբաղվել Ջավախքի խնդիրներով` իրենց այդ ակտիվության մեջ ներգրավելով նաեւ հայամետ կոնգրեսականներին։ Տարեսկզբին ամերիկյան Կոնգրեսի հայկական հարցերով հանձնախմբի ղեկավարներն այս հարցը քննարկեցին Միացյալ Նահանգներ ժամանած Միխեիլ Սահակաշվիլիի հետ: Ավելի վաղ` 2011 թվականի սեպտեմբերին, Հայ դատի Վաշինգտոնի գրասենյակի ղեկավար Քեն Խաչիկյանն ու կառույցի հանրային կապերի գծով տնօրեն Էլիզաբեթ Չուլջյանը մեկնել էին Վրաստան` Ջավախքի խնդիրները քննարկելով վրացական կառավարության եւ տեղի հասարակական կազմակերպությունների ներկայացուցիչների հետ:
Գեւորգ Ստամբոլցյան
«Ազատություն» ռադիոկայան
