Լուսանկարը` Amnesty International
«Amnesty International» իրավապաշտպան կազմակերպության համաձայն, մահապատիժն իրականացվում է ավելի փորք թվով՝ հիմնականում ասիական երկրների կողմից, սակայն իրականացված մահապատիժների թիվը «մտահոգիչ է»:
Իրավապաշտպանական կազմակերպությունը երեքշաբթի օրը հայտնել է, որ աշխարհի պետությունների ընդամենը տասը տոկոսն է այժմ մահապատիժ իրականացնում, ինչը մեկ երրորդով պակաս է տասը տարի առաջ գրանցված ցուցանիշից:
«Amnesty International»-ի ՄԱԿ-ի գրասենյակի ղեկավար Խոսե Լուիս Դիասի համաձայն, մահապատժից չհրաժարված պետություններում մահապատժի ենթարկվածների թիվն ավելանում է՝ անցյալ տարի կազմելով 676 մարդ: Դիասն ասել է, որ գնալով ավելի շատ մարդ է մահապատժի ենթարկվում ոչ բռնի հանցագործություններ կատարելու համար:
Կազմակերպության համաձայն, աշխարհում ամենամեծ թվով մահապատիժներ են իրականացվում Չինաստանում, Իրաքում, Իրանում, Հյուսիսային Կորեայում, Սաուդյան Արաբիայում, Սոմալիում, ԱՄՆ-ում և Եմենում:
Կարդացեք նաև
Մահապատիժ իրականացնող երկրների ցանկում Միացյալ Նահանգները, որտեղ անցյալ տարի ի կատար է ածվել 43 մահապատիժ, զբաղեցնում է հինգերորդ տեղը: ԱՄՆ-ը «Մեծ ութնյակ»-ի անդամ միակ երկիրն է, որտեղ մահապատիժը դեռևս արգելված չէ:
Արմեն Հովհաննիսյան
«Ամերիկայի Ձայն»
