Մարտի 25-ին, ժամը 14-ին, շտապօգնության մեքենայով Կապանի բժշկական կենտրոն է տեղափոխվել Կապանի քաղաքապետ Արտուր Աթայանը: Կեսօրին քաղաքապետն իր առանձնատանը վատ է զգացել, հարազատները մտածել են, որ դա նախօրեին, կանանց միամսյակին նվիրված միջոցառմանը քաղաքապետի ակտիվ մասնակցության արդյունքն է: Հիվանդանոցում պարզվել է, որ քաղաքապետի մոտ սրտի հետ կապված խնդիրներ են ծագել: Կենտրոնում կազմակերպվել է առաջին բուժօգնությունը, ինչը թույլ է տվել խուսափել հետագա բարդություններից: Երեկոյան քաղաքապետին հատուկ բուժմեքենայով տեղափոխել են մայրաքաղաք` Էրեբունի բժշկական կենտրոն:
Ըստ Կապանի քաղաքապետի մամլո խոսնակ Հասմիկ Թովմասյանի` քաղաքապետի առողջական վիճակը ներկայումս կայուն է գնահատվում, կյանքին վտանգ չի սպառնում: Առաջիկա երկու օրերի ընթացքում պարզ կլինի բուժման հետագա ընթացքը:
Մերի ՍՈՂՈՄՈՆՅԱՆ
