Իրացման գոտու բնակիչ Սեդրակ Բաղդասարյանը 2004 թվականին վտարվելով Բյուզանդի հասցեում գտնվող իր բնակարանից, ՀՀ մի քանի դատական ատյաններ անցնելուց հետո, դիմել էր Մարդու իրավունքների եվրոպական դատարան: Այսօր «Արմատ» ակումբում Սեդրակ Բաղդասարյանը լրագրողներին ներկայացրեց այդ կառույցի որոշումը: Պարոն Բաղդասարյանի ներկայացմամբ՝ Եվրադատարանը որոշել է. «Հայաստանի կառավարությունը ձեզ առաջարկում է բնակարան, եւ կառավարությունը պարտավորվում է 3 ամսվա ընթացքում տալ ձեզ այդ բնակարանը»:
Սեդրակ Բաղդասարյանի պատմելով, երբ դիմել է արդարադատության փոխնախարար Մելիքյանին եւ ներկայացրել եվրոպական դատարանի որոշումը, փոխնախարարն ասել է. «Դուք պետք է վերադարձնեք դատարանների վճիռների հիման վրա, 2005 թվականին ձեզ տրամադրած փոխհատուցման գումարները, բայց այս առթիվ որեւէ պաշտոնական գրություն մեզ չի ներկայացվել»: Այդ գումարը, որը Սեդրակ Բաղդասարյանը ստացել է, ըստ նրա, $22 հազար է՝ մոտ 117 քմ բնակարանի դիմաց, ընդ որում, Բաղդասարյանի խոսքերով ասած՝ իր գույքը գնահատվել է շուկայականից բավականին ցածր գներով. «Նշեմ, որ մեզ տրամադրված այդ փոխհատուցման չնչին գումարները հազիվ բավարարել է վարձակալած կացարանների վարձավճարների համար»: Մինչդեռ իրացման գոտու բնակչի խոսքերով՝ եվրոպական դատարանի որոշման մեջ կառավարության տրամադրած փոխհատուցման գումարը վերադարձնելու մասին խոսք անգամ չկա:
Այն, որ Հայաստանի կառավարությունը հրաժարվում է ամբողջությամբ կատարել Եվրոպական դատարանի որոշումը, Սեդրակ Բաղդասարյանն ասպես մեկնաբանեց. «Եվրոպական դատարանին խաբելը, մանավանդ այս նախընտրական շրջանում, կառավարությունը փորձում է ցույց տալ, որ սեփականության , խոսքի եւ այլ իրավունքների զանգվածային խախտումների մասին ավելորդ խոսակցություններից զերծ մնալու համար է: Սրանից բխում է, որ Եվրոպայի Խորհրդին Հայաստանի մասնակցությունը ավելի շուտ ցուցադրական բնույթի է»:
Մեր այն հարցին, որ եթե կառավարությունը չկատարի Եվրադատարանի որոշումը՝ ո՞րն են լինելու իր հետագա քայլերը եւ ինչպե՞ս կարող են պարտավորեցնել կառավարությանն իրեն բնակարան տրամադրել, պարոն Սեդրակյանը պատասխանեց, որ կրկին պետք է դիմեն Եվրադատարան, նշելով, որ իրենց որոշումը չի կատարվել, իսկ դատարանն էլ կրկին կվերանայի գործը եւ վերջնական վճիռ կկայացնի:
Կարդացեք նաև
Սեդրակ Բաղդասարյանի խոսքերով՝ նախորդ տարի Եվրադատարանը կայացրել է 6 որոշում, որից 3 ընտանիքին՝ պետք է բնակարան տրամադրվի, մյուսներին՝ գումար:
Նելլի ԲԱԲԱՅԱՆ
