Թիվ 25 ընտրատարածքում մեծամասնական ընտրակարգով առաջադրվել է հինգ թեկնածու: Հիմնական մրցակիցներն են` ՀԱԿ-ի պաշտպանյալ, անկուսակցական Սասուն Միքայելյանը, ՕԵԿ-ի կողմից ՀՀ կապի եւ տրանսպորտի նախարար Մանուկ Վարդանյանը եւ ԲՀԿ-ի կողմից ԲՀԿ անդամ Դավիթ Քոչարյանը, որն ասում են, «հարգված տղա է»:
Aravot.am-ի տեղեկություններով, այն օրը, երբ պաշտոնապես հաստատվել է, որ ՕԵԿ-ի կողմից այդ տարածքում մեծամասնական կարգով առաջադրվելու է Մանուկ Վարդանյանը, նրա նախկին ենթական` կադաստրի Կոտայքի մասնաճյուղի տնօրեն Դերենիկ Գեւորգյանը Մանուկ Վարդանյանին հրավիրել է Սոլակ գյուղում գտնվող իր տուն եւ գառ մորթել նրա ոտքերի տակ` մատաղ անելով շեֆի հաջողության համար: Հիշեցնենք, որ Մանուկ Վարդանյանը բավական երկար ժամանակ ղեկավարում էր կադաստրի հանրապետական կառույցը: Իհարկե, Դերենիկ Գեւորգյանը միայն մատաղով չի սահմանափակվել: Խոստացել է նախկին շեֆին ցուցաբերել «ամենայն աջակցություն»:
Նելլի ԳՐԻԳՈՐՅԱՆ
