Օրերս գյուղատնտեսության նախարարությունը կառավարությանն առաջարկել էր ազոտական պարարտանյութը եւ դիզելային վառելանյութը Հայաստանի Հանրապետության համայնքներին մատակարարելու համար վերջնաժամկետ սահմանել 2012 թվականի մայիսի 1-ը: Կառավարության նախկին որոշմամբ դիզվառելիքի մատակարարման վերջնաժամկետը մարտի 20-ն էր, իսկ ազոտական պարարտանյութինը՝ ապրիլի 10-ը: Ժամկետների փոփոխության պատճառը, ինչպես տեղեկացրել էր գյուղնախարարությունը, կլիմայական վատ պայմաններն են. ծովում տեղի ունեցող բարձր աստիճանի ալեկոծության պատճառով պարարտանյութով բեռնված նավերին կառամատույց չի տրամադրվում եւ բեռնաթափում չի իրականացվում, իսկ հատկացված դիզելային վառելանյութի դիմաց գումարների հավաքագրման գործընթացը դանդաղ է ընթանում:
Կառավարությունը մարտի 22-ի նիստում համաձայնություն է տվել գյուղնախարարության առաջարկությանը, ըստ այդմ՝ մարզերին ազոտական պարարտանյութ եւ դիզվառելիք բաշխելու վերջնաժամկետը սահմանելով մայիսի 1-ը:
Արդյոք գյուղատնտեսական աշխատանքների, պարարտանյութի բաշխման համար այդ ժամկետը գյուղացու համար ուշ չէ՞, «Առավոտի» այս հարցին Հայաստանի ագրարագյուղացիական միավորման նախագահ Հրաչ Բերբերյանն ասաց. «Քանի որ այս տարի գարունը 25 օր ուշացումով է եկել, ուստի պարարտանյութի բաշխումն այնքան էլ ուշացումով չէ: Մենք մարզեր ունենք, որտեղ, օրինակ՝ կարտոֆիլը հուլիսից են սկսում ցանել, այնպես որ, մայիսի 1-ը ուշ չէ»:
Նշենք, որ գյուղական համայնքներին պետք է բաշխվի 25 հազար տոննա ազոտական պարարտանյութ, մեկ պարկը 6 հազար դրամով, իսկ դիզվառելիք՝ 12.6 հազար տոննա, 1 լիտրը՝ 350 դրամ:
Կարդացեք նաև
«Առավոտ» օրաթերթ
