Այսօր ՀՀ գլխավոր դատախազ Աղվան Հովսեփյանը հրաման է ստորագրել, որպեսզի դատախազների աշխատանքային խումբ ստեղծվի, որը կզբաղվի ընտրախախտումների փաստերի առթիվ բոլոր հաղորդումների գրանցմամբ, հաշվառմամբ դրանց ընթացք տալու բոլոր գործառույթներով եւ դրանց վրա հսկողություն իրականացնելով:
Այսօր այդ մասին ՀՀ գլխավոր դատախազ Աղվան Հովսեփյանը 2 լրատվամիջոցի պարզաբանումներ տվեց: Նրա խոսքերով՝ «Խմբում ներառվել են դատախազական բոլոր ոլորտներից՝ ավելի փորձառու դատախազներ: Հետեւելու ենք, որ բոլոր հաղորդումները, դիմում-բողոքները օրինական լուծում ստանան: Բացի դա, դատախազների այդ խումբը նպաստելու է, որպեսզի թե ժամանակի մեջ եւ շատ օպերատիվ կարգով դրանցով որոշումներ կայացվեն, որպեսզի քաղաքացիները կարողանան օրենքով նախատեսված կարգով բողոքարկել բոլոր կայացրած որոշումները: Ստեղծված է այդ հաղորդումներով առանձին հաշվառման մատյաններ, որը կնպաստի նրան, որ դրանք կլինեն առանձնահատուկ հսկողության ներքո: Բացի դա, ապահոված է նաեւ հրապարակայնությունը այդ գործընթացների: Խմբում ներառված են նաեւ գլխավոր դատախազի մամուլի քարտուղարը, խորհրդականը, ստեղծված է առանձին գրասենյակ, որտեղ գրանցվում, հաշվառվում եւ առաքվում են այդ բոլոր գրագրությունները: Այս կարգը, կարծում եմ, կնպաստի , որ որեւէ դիմում- բողոք անուշադրության չմատնվելուց զատ օրենքով նախատեսված կարգով քննություն ստանա»:
Aravot.am-ի հետ զրույցում պարոն Հովսեփյանն ասաց, որ իրականացվելու է նաեւ ընտրությունների ժամանակ խախտումների վերաբերյալ բոլոր հաղորդումների եւ ԶԼՄ հրապարակումների մշտադիտարկում, որի արդյունքում մամուլը նույնպես դառնում է քննության առարկա: Փաստերը ստուգվելու են, տրվելու են իրավական գնահատականներ եւ ամբողջ տեղեկատվությունը տեղադրվելու է դատախազության կայքում. «Նախորդ ընտրությունների ժամանակ եւ առ այսօր չի ստացվել որեւէ բողոք, կամ առարկայական հրապարակում, որ մնացել է անարձագանք, գուցե տրված իրավական գնահատականի վերաբերյալ եղել են տարակարծություններ, բայց հենց դատախազությունն էլ հետամուտ է եղել, որպեսզի կայացնեն որոշումներ, որոնք օրենքով սահմանված կարգով կարող էին քննարկման առարկա դառնալ կամ բողոքարկվել, վիճարկվել: Այս տարի կփորձենք ավելի հետեւողական լինել»: Մեր հարցին՝ իսկ խտրականություն չի՞ դրվելու, թե դա որ լրատվամիջոցն է հրապարակում՝ «Հանրային հեռուստատեսությո՞ւնը», թե՞ , ասենք, «Հայկական ժամանակը»՝ պատասխանեց. «Բացարձակապես նման խնդիր չկա: Նախորդ ընտրություններին ընտրատարածքային ընտրական հանձնաժողովի նախագահը ենթարկվեց քրեական պատասխանատվության՝ դատապարտվելով ազատազրկման հենց մամուլի հրապարակումների հիման վրա հարուցված քրգործով՝ դա դրա վառ վկայությունն է: Խոսքը «Երկիր մեդիա» եւ «Ազատություն» ռ/կ-ի մասին է»:
Հռիփսիմե ՋԵԲԵՋՅԱՆ
Կարդացեք նաև
