Ըստ Գոռ Հովհաննիսյանի՝ Հայաստանը չբացահայտված տեսարժան վայրեր շատ ունի: Դրանք հետաքրքիր են ոչ միայն հայերին, այլեւ՝ օտարերկրացիներին, որոնք պարզապես հոգնել են միայն Գառնին ու Սեւանն այցելելուց:
Այսօր Հայաստանում գործում է էքստրեմալ սպորտաձեւերի եւ տուրիզմի ակումբ: «Armenian Extreme Club»-ի նախագահ Գոռ Հովհաննիսյանը պատմում է, որ իրենք զբաղվում են արշավներով եւ փորձում այն զարգացնել Հայաստանում: «Հասարակական կազմակերպություն ենք, գումար չենք աշխատում, ունենք 120 անդամ ու միշտ օգնում ենք միմյանց»,- ասում է նախագահը: Նա հայտնում է նաեւ, որ 2011 թվականի ամռանն ունեցել են մոտավորապես 80 զբոսաշրջիկ` հարեւան երկրների ակումբներից: «Միասին շատ հետաքրքիր օրեր ենք անցկացրել` թռել պարաշյուտով, եղել շատ հետաքրքիր քարանձավներում»,-պատմում է Հովհաննիսյանը: Ասում է՝ Հայաստանի տարածքում նոր վայրեր եւ քարանձավներ են հայտնաբերել, որոնց հարեւանությամբ ապրել են մարդիկ, բայց չեն իմացել դրանց մասին: Ինչպես Գոռն է ասում` մեր երկիրը փոքր, բայց հարուստ ժառանգություն ունի՝ թե՜ մշակութային, թե՜ բնության եւ թե՜ կոթողների առումով: Նրանց համար նոր վայրեր էին Սոնասարը, Հարյուրի կիրճը եւ այլն: «Անցած անգամ գտել ենք երկու հրաշք քարանձավեր, որոնք թաքնված են մի հրաշք ու հեքիաթային վայրում` մեծ քարե կորաձեւ կիրճում, որտեղ տանող ճանապարհով անցնելը միայն ամեն ինչ արժե: Կիրճն անվանել ենք «Հսկա կրկես», որն ունի անկրկնելի տեսարաններ»,-ասում է ակումբի նախագահը, ինչպես նաեւ հայտնում, որ իրենց արշավներին կարող են մասնակցել 14 տարեկանը լրացած, եւ դրանից բարձր, անձիք: Անչափահասները պետք է ունենան ծնողի թույլտվություն կամ նրանց հետ գան: Գոռ Հովհաննիսյանն ասում է, որ մի քանի օրից պատրաստվում են թռչել պարաշյուտով: «Բոլոր տղաները, բացառությամբ ինձանից, բուժզննումը չանցան, իսկ աղջիկներն անցան: Ստացվում է, որ էքստրեմի միջոցով պարզեցինք, որ գեղեցիկ սեռը ֆիզիկապես ավելի ուժեղ է»,- ծիծաղելով ասում է նա` հավելելով, որ մասնակցության հայտեր կարող են ուղարկել մինչեւ ապրիլի 1-ը:
«Armenian Extreme Club»-ում զավեշտալի դեպքեր շատ են լինում: Գոռ Հովհաննիսյանը պատմում է, որ անցած տարի ամռանը գնացել էին Աժդահակ. «Շնագայլերը հենց մեր վրանի մոտից սնունդը տարել էին: Արթնացանք հենց են պահին, երբ պոչները ցցած ու մեր ցելոֆանները բերաններին, հպարտ-հպարտ փախնում էին: Սոված մնացինք, բայց ահագին ծիծաղեցինք»:
Իսկ արշավի գումարի համար նախագահն ասաց, որ ամեն անգամ տարբեր է լինում, դա կախված է այն վայրից, թե որտեղ են գնալու:
Ռուբինա Սաֆարյան
