ՀՅԴ խմբակցության քարտուղար Արտյուշա Շահբազյանի համոզմամբ, նոր խորհրդարանն ավելի խայտաբղետ է լինելու ու ընդդիմությունն ավելի մեծ կշռով է ներկայացված լինելու: Այս մասին այսօր «Peoplemeter» ակումբում ասուլիսի ժամանակ ասաց Ա. Շահբազյանը:
Նա կարծիք հայտնեց, որ կոալիցիան ներկայացնող ցուցակներից մեծ փոփոխություններ ակնկալելը դժվար է.«Այլ խոստումներ ու ցանկություններ եղան, թե խորհրդարանն ավելի աշխատունակ կդարձնեն, կարող էին ամբողջությամբ խորհրդարանական աշխատանքով զբաղվող մարդիկ գալ»: Պարոն Շահբազյանի խոսքերով, արմատական փոփոխություններ են հարկավոր, իսկ Դաշնակցության շանսերն ընտրություններում նա գնահատեց բարձր. «Շատ ավելի լավ, քան այսօր ունենք: Այս տարիների ընթացքում հանդես եկանք իբրեւ մի կուսակցություն, որ դեմքը չփոխեց»:
Կուսակցության նախընտրական ծրագիրն էլ ներկայացնելիս՝ նա ասաց, որ այն սոցիալական ու ժողովրդավարական հիմք ունեցող ծրագիր է. «Հեռու կլինենք բամբասանքներից ու ծայրահեղություններից ու ժողովրդին կներկայանանք մեր ծրագրերով»:
Ընտրություններից հետո քաղաքական ուժերի հետ կոալիցիա ձեւավորելու հավանականությունն էլ չբացառեց. «Եթե նոր իրավիճակ կստեղծվի կամ այս ուժը կգա բոլորովին ուրիշ ծրագրով, կամ Հանրապետական կուսակցությունը կմտնի խորհրդարան եւ կասի՝ մենք համոզվեցինք, որ հայ–թուրքական արձանագրությունը մեզ համար վտանգավոր է ու հետ ենք կանչում մեր ստորագրությունը: Կգա՞ այդպիսին՝ մենք կհամագործակցենք»:
Կարդացեք նաև
Արփինե ՍԻՄՈՆՅԱՆ
