Պլովդիվում շարունակվում է շախմատի Եվրոպայի տղամարդկանց 13-րդ անհատական առաջնությունը
Խաղացված երկու տուրերում մեր հանրապետությունից միայն երկու հոգի՝ գրոսմայստերներ Հրանտ Մելքումյանն ու Ռոբերտ Հովհաննիսյանն են հաղթանակներ տոնել եւ գտնվում են մրցաշարային աղյուսակը գլխավորող 40 շախմատիստների շարքում: Ընդ որում՝ Մելքումյանը սպիտակներով հաղթել է Վրաստանի ներկայացուցիչ Դավիթ Բենիձեին, իսկ Հովհաննիսյանը սեւ խաղաքարերով պարտության է մատնել իսրայելցի Էյլոն Նակարին: Մեկական միավոր վաստակել են նաեւ օլիմպիական չեմպիոններ Գաբրիել Սարգսյանն ու Տիգրան Լ. Պետրոսյանը:
Մեր մյուս շախմատիստներից Սերգեյ Մովսիսյանը, Սամվել Տեր-Սահակյանը, Զավեն Անդրիասյանը, Վլադիմիր Հակոբյանը եւ Հովհաննես Գաբուզյանը (Հովհաննեսը վիճակահանության քմահաճույքով մեկնարկային երկու պարտիաներում էլ հանդիպել է իր թիմակիցների հետ) բաժանել են միավորը եւ միայն Արման Փաշիկյանն ու երիտասարդ եւ անփորձ Վլադիմիր Պողոսյանն են անհաջողության մատնվել:
Երկու տուրից հետո հայաստանցի շախմատիստները մրցաշարային աղյուսակում դասավորվել են հետեւյալ հերթականությամբ:
Կարդացեք նաև
9. Հրանտ Մելքումյան՝ 2,0 միավոր
23. Ռոբերտ Հովհաննիսյան՝ 2,0
50. Զավեն Անդրիասյան՝ 1,5
80. Սերգեյ Մովսիսյան՝ 1,5
84. Սամվել Տեր-Սահակյան՝ 1,5
104. Գաբրիել Սարգսյան՝ 1,5
117. Տիգրան Լ. Պետրոսյան՝ 1,5
131. Արման Փաշիկյան՝ 1,0
184. Հովհաննես Գաբուզյան՝ 1,0
214. Վլադիմիր Հակոբյան՝ 1,0
318. Վլադիմիր Պողոսյան՝ 0
Բուլղարիայում հանդես են գալիս եւս երկու հայ գրոսմայստերներ, որոնք ներկայացնում են Ռուսաստանը: Արթուր Գաբրիելյանը 2,0 միավորով առաջատարների ցուցակում է, իսկ Սերգեյ Գրիգորյանցը 1,5 միավորով 121-րդն է:
Երեկ երրորդ տուրում մեր տղաները կազմել էին հետեւյալ զույգերը:
Ռոբերտ Հովհաննիսյան-Էտյեն Բակրո (Ֆրանսիա)
Նիլս Գրանդելիուս (Շվեդիա)-Հրանտ Մելքումյան
Սերգեյ Մովսիսյան-Վասիլիոս Կոտրոնիուս (Հունաստան)
Էռնեստո Ինարկիեւ (Ռուսաստան)-Սամվել Տեր-Սահակյան
Մարիուս Մանոլաշ (Ռումինիա)-Գաբրիել Սարգսյան
Տիգրան Լ. Պետրոսյան- Մաթեյ Սեբենիկ (Սլովենիա)
Բոսկո Տամիկ (Բոսնիա եւ Հերցեգովինա)- Զավեն Անդրիասյան
Պավել Սիմասեկ (Չեխիա)-Վլադիմիր Հակոբյան
Արման Փաշիկյան-Օգուլքան Կանմազալպ (Թուրքիա)
Հովհաննես Գաբուզյան-Վլադիմիր Պոտկին (Ռուսաստան)
Վլադիմիր Պողոսյան-Միոդրագ Պերունովիչ (Սերբիա):
Ա. ՀԱԿՈԲՅԱՆ
«Առավոտ» օրաթերթ
