Այսօրվանից ԵԱՀԿ/ ԺՀՄԻԳ-ը սկսում է Հայաստանում մայիսի 6-ին կայանալիք խորհրդարանական ընտրությունների դիտորդական առաքելությունը:
Ժողովրդավարական հաստատությունների եւ մարդու իրավունքների (ԺՀՄԻԳ) գրասենյակին դիտորդական առաքելությամբ Հայաստան են հրավիրել ՀՀ իշխանությունները: Դա մտնում է մեր երկրի պարտավորությունների մեջ` որպես ԵԱՀԿ անդամ մենք պարտավոր ենք ընտրություններին հրավիրել ԺՀՄԻԳ-ին` հետեւելու եւ գնահատելու դրանք:
Այս տարի ԺՀՄԻԳ-ի 250 կարճաժամկետ, 24 կարճաժամկետ դիտորդներից եւ 13 միջազգային փորձագետներից բաղկացած առաքելությունը գլխավորում է տիկին Ռադմիլա Շեկեռինսկան, որն այսօր կայացած ասուլիսում հստակ նշեց իրենց նպատակները` գնահատել մայիսի 6-ին կայանալիք ընտրությունների եւ դրանց նախորդող նախընտրական գործընթացների համապատասխանությունը ինչպես ԵԱՀԿ անդամ երկրների ստանձնած պարտավորություններին, այնպես էլ մեր` ՀՀ օրենսդրությանը:
Կարդացեք նաև
Մինչ քվեարկության օրը առաքելությունը կհետեւի քարոզարշավին, կգնահատի ԶԼՄ-ների կողմից դրանց լուսաբանումը, կուսումնասիրի ընտրական գործընթացին առնչվող մարմինների գործունեությունը, կհանդիպի թեկնածուների, կուսակցությունների, ԶԼՄ-ների եւ քաղաքացիական հասարակության անդամների հետ:
Ընտրությունների ավարտից անմիջապես հետո` հաջորդ օրը, ԵԱՀԿ/ԺՀՄԻԳ-ը կհրապարակի նախնական, իսկ երկու ամսից` վերջնական զեկույցը:
Մելանյա ԲԱՐՍԵՂՅԱՆ
