Այսօր Հայաստանի ազգային գրադարանում բանասեր, լեզվաբան, մատենագետ, գրքագետ Ռաֆայել Իշխանյանի ծննդյան 90-ամյակին նվիրված ցերեկույթ էր կազմակերպվել: Գրադարանի հանրության հետ կապերի և միջոցառումների բաժնի վարիչ Անահիտ Մանուչարյանը նշեց, որ
միջոցառումը հիշատակի ու հարգանքի տուրք է` պրոֆեսորի հիշատակին. «Խորին ակնածանքով, թախիծով ու ջերմությամբ են համակվում բոլոր նրանք, ովքեր Ազգային գրադարանի պատերի ներքո աշխատել են Ռաֆայել Իշխանյանի կողքին»:
Հիշեցնենք, որ 1991-1995թթ.-ին Ռ. Իշխանյանը եղել է Հայաստանի ազգային գրադարանի տնօրեն: Ազգային գրադարանի փոխտնօրեն Անահիտ Հարությունյանը նշեց. «Ես կարծում էի, թե հուզվելու հատկությունս կորցրել եմ, բայց ոչ, այս սենյակում ամեն ինչ հիշեցնում է մեծ բանասերին: Այնպիսի մարդիկ, ինչպիսին նա էր, հազվագյուտ են: Բազմաշնորհ, սկզբունքային, հետևողական, համառ, տոկուն էր, նա դիմացել էր ահռելի դժվարությունների, թե սոցիալական, թե կենցաղային, թե հոգեբանական: Նպատակը այն էր, որ մենք հայերս պահպանենք մեր ինքնությունն ու հարատևությունը, և ապրենք անկախ պետությունում»:
Հանրային խորհրդի նախագահ Վազգեն Մանուկյանի կարծիքով, Ռաֆայել Իշխանյանը մեծ սերնդի ուսուցիչ էր. «Ծնվեցին հսկաներ, որոնցից մեկը նա էր, մեր բարեկամն էր ու նպատակը ինքնուրույն լինելու ու ազատ լինելու գաղափարն էր: Ժամանակ պետք է անցնի, որ նրա աշխատանքը ըստ արժանվույն գնահատվի»:
Կարդացեք նաև
Գրադարանում առանձին ցուցափեղկերով ներկայացվեցին Ռաֆայել Իշխանյանի հեղինակած, խմբագրած և նրա մասին պատմող գրքերն ու ամսագրերը:
Անժելա ՇԱՀՈՒՄՅԱՆ
