Հակառակ վերջին օրերին համառորեն շրջանառվող տեղեկությունների, ինչպես արդեն հաղորդել ենք՝ «Ժառանգության» համամասնական ցուցակը ԿԸՀ-ին հանձնվեց առանց վերանայումների՝ ճիշտ այն տեքստով, ինչ կուսակցությունը հրապարակել էր օրեր առաջ՝ հիմք ընդունելով «Ժառանգության» խորհրդի որոշումը : Այդ մասին Aravot.am-ի հետ զրույցում ասաց կուսակցության մամուլի խոսնակ եւ համամասնական ցուցակում ընդգրկված Հովսեփ Խուրշուդյանը՝ հավելելով, որ ընտրական ցուցակի ամբողջական տարբերակը բաղկացած է 73 թեկնածուից, որոնց թվում ԱԺ պատգամավոր Լարիսա Ալավերդյանը 41-րդն է եւ մեր լրագրող գործընկեր Լուսինե Պետրոսյանը՝ 50-րդը:
Ինչ վերաբերում է «Ժառանգության» մեծամասնական առաջադրումներին, ապա այս պահին, ընտրատարածքային ընտրական հանձնաժողովներում իրենց թեկնածությունը գրանցելու համար արդեն իսկ հայտ են ներկայացրել Ստեփան Սաֆարյանը՝ Ավանի թիվ 1 ընտրատարածք, Զարուհի Փոստանջյանը՝ Արաբկիրի թիվ 4, Արմեն Մարտիրոսյանը՝ Աջափնյակի թիվ 6, Ռուբեն Հակոբյանը՝ Կենտրոնի թիվ 9, Անահիտ Բախշյանը՝ Շենգավիթի թիվ 12 , Գագիկ Մարգարյանը՝ Արմավիրի մարզի թիվ 21 եւ Գառնիկ Սահակյանը՝ Լոռու մարզի թիվ 30 ընտրատարածքներ:
Ի պատասխան մեր հարցին, թե ինչո՞ւ իրենց գործընկեր «Ազատ դեմոկրատներ» կուսակցությունը որոշեց ձեռնպահ մնալ մեծամասնական առաջադրումներից՝ Խուրշուդյանն ասաց. «Ամենասկզբից էլ մտադիր չէին առաջադրվել, իսկ թե ի՞նչ պատճառաբանությամբ՝ ճիշտ է հարցնել իրենցից»:
Հավելենք, որ «Ժառանգության» ներկայացուցիչը ԿԸՀ-ում Արմեն Թորոսյանն է:
Նաիրա ՄԱՄԻԿՈՆՅԱՆ
