Իջեւան քաղաքի Անկախության փողոցում տեղադրված է «Քվեն ուժ է» հասարակական շարժման կարմիր վրանը: Վրանում շարժման իջեւանցի մասնակիցներ Ռոբերտ Խաչատրյանը եւ Արսեն Ալիխանյանն էին, նրանց առաջ դրված սեղանին՝ ընտրական իրավունքի մասին բրոշյուրներ: Ռ. Խաչատրյանը եւ Արսեն Ալիխանյանն ասացին, որ իրենք ՀՅԴ անդամներ են, սակայն այս դեպքում հանդիսանում են հասարակական շարժման ներկայացուցիչներ: Նրանք գրառում են շարժմանը միացողների անուն-ազգանունները, վերջիններս ստորագրում են, սակայն այդ մարդկանց անձնագրային տվյալները չեն հաշվառվում: Հասարակական շարժման կարմիր վրանը Իջեւանում տեղադրված է մարտի 16-ից, անցած 6 օրվա ընթացքում շարժմանը միացել է շուրջ 160 իջեւանցի: Ռոբերտ Խաչատրյանը եւ Արսեն Ալիխանյանն ասացին, որ շատերն են մոտենում եւ հայտարարում՝ ընտրությունների միջոցով Հայաստանում ոչինչ չի փոխվելու, ոմանք էլ ասում են, թե սպասում են ընտրակաշառքի: Հավելենք՝ Իջեւանում շրջանառվող խոսակցությունների համաձայն՝ մայիսի 6-ի խորհրդարանական ընտրություններում յուրաքանչյուր ձայնի համար ընտրակաշառքը լինելու է 10 հազար դրամ:
ՈՍԿԱՆ ՍԱՐԳՍՅԱՆ
«Առավոտ» օրաթերթ
